A proba patrocinada pola Deputación da Coruña ten un dos percorridos máis esixentes da súa historia
07 may 2015 . Actualizado a las 19:46 h.A Volta Ciclista á Provincia celebrarase do 15 ao 17 de maio con saída dende o concello de Monfero, onde se presentou. «Cremos firmemente na idea de cambiar de hábitos no ámbito da mobilidade», declarou o presidente da Deputación, Diego Calvo.
A Volta chegará a 21 concellos das comarcas da Coruña, Ferrolterra Eume e Ortegal. O primeiro día os ciclistas sairán de Monfero e pasarán por Irixoa, Oza-Cesuras, Betanzos, Miño, Pontedeume, Cabanas e Vilarmaior para volver ao municipio de saída.
O día 16 a sede será Mañón, en concreto O Barqueiro, para seguir por Ortigueira, As Somozas, As Pontes, Cedeira e rematar de novo no Barqueiro.
O último día a saída e final será en Valdoviño, pero o pelotón tamén pasará por San Sadurniño, Neda, Ferrol, Narón, Moeche, Cerdido, Cariño e Cedeira.
Os ciclistas profesionais Ezequiel Mosquera e Gustavo César Veloso advertiron de que son «as etapas máis duras dos últimos anos».
Ademais da Volta Ciclista, a iniciativa inclúe actividades complementarias para os máis pequenos, que só terán que levar a súa bicicleta e casco. Haberá xincanas, xogos e unha pequena carreira en liña. Os participantes recibirán agasallos, e en cada etapa se regalará unha bicicleta a un dos participantes.
A Deputación da Coruña inviste máis de 51.000 euros neste programa, entre gastos de organización e premios.