![Equipos con anos de experiencia están detrás de series de éxito como «Néboa», «El desorden que dejas» e «O sabor das margaridas»](https://img.lavdg.com/sc/_cXDiOUhhixjzCMA9BCqIyphJS8=/480x/2021/09/30/00121633030153814596590/Foto/galician.jpg)
Os «thrillers» feitos en Galicia deron lugar a un novo xénero, con sabor propio, que conquista o público das grandes plataformas e da televisión. Cal é a clave deste éxito sen fronteiras?
03 oct 2021 . Actualizado a las 23:38 h.A denominación é de do diario británico The Guardian. Chámanlle «Galician noir», un xénero que vai sumando títulos e o recoñecemento do público e varre fronteiras. Recolle a atmosfera das paisaxes galegas e a vangarda do xénero negro en streaming.
Algunhas das series baixo o paraugas desde estilo con denominación de orixe evocan os contos de medo das aldeas, outras escollen tramas máis urbanas, pero todas deron na tecla do éxito. Por que?
Máis alá do misticismo galego do que beben, este bum débelle moito a un tecido industrial consolidado, un sector con experiencia que o único que precisaba era dar un salto para colocar as súas producións a ollos do público internacional. A tele tamén ten o seu protagonismo, pero coa chegada das plataformas deuse o gran empurrón e o non hai quen as pare.
Néboa, de Voz Audiovisual, foi unha das series pioneiras, na televisión, deste estilo propio. «A produtora tiña unha experiencia probada neste xénero. Fomos os primeiros que fixemos unha serie centrada no narcotráfico galego, Matalobos, e coa explosión do thriller en todo o mundo decidimos continuar. Galicia reúne as condicións perfectas para este xénero e somos conscientes das vantaxes que ten facelo aquí, por iso fixemos Néboa», explica Fernanda Tabarés, directora de Voz Audiovisual. A última produción da empresa foi Método Criminal, unha ficción protagonizada por Miguel Canalejo, quen interpreta ao fillo dun narcotraficante que se debate entre atender esta herdanza ou o negocio legal da familia, un tanatorio. «As series deste xénero adoitan ter unha estrutura clásica que sempre funciona e non importa a localización, no caso de Néboa foi en Ortegal, pero as personaxes e as relacións poden trasladarse a calquera lugar. Igual que na literatura, o noir sempre estará en auxe», conta Tabarés.
Outra das producións exitosas, hoxe en boca de todos, é O sabor das margaridas, a serie galega que levou a nosa lingua e bo facer da industria ao máis popular da plataforma Netflix. No Reino Unido foi unha das dez series de ficción de fala non inglesa máis vistas. E o seu non é un caso illado. Na mesma plataforma atopamos El desorden que dejas, un thriller producido por Vaca Films que bateu récords de audiencia. En HBO temos Auga Seca, producida por Portocabo en colaboración coa televisión pública portuguesa (RTP).
Ghaleb Jaber, produtor de CTV, responsable de O sabor das margaridas, sinala que estar en Netflix foi unha proba para demostrar que as series galegas poden cruzar fronteiras.
«Desde lo local se conquista lo global», así ve Emma Lustres, produtora de El desorden que dejan, o éxito imparable das producións galegas. «Nuestra serie no podía pasar en Madrid ni en ningún otro lado, ya que su esencia en forma e historia es gallega y Netflix apostó por contar la historia donde sucede», explica. Diego Ávalos, vicepresidente de contidos de Netflix España, sinala que o obxectivo da compañía é trasladar a diversidade das historias locais a máis de 190 países. «Nos hemos acercado a las comunidades creativas de toda la geografía y esto nos ha permitido llevar a las pantallas historias tan únicas como El desorden que dejas. Hay mucho talento en el audiovisual gallego», destaca Ávalos.
O caso de Auga Seca ten a peculiaridade de que naceu con esa vocación de cruzar fronteiras, xa que a propia historia ten lugar entre Galicia e Portugal e o obxectivo era emitila en ambos países, aproveitando a proximidade física, cultural e lingüística. «Producir sen contar coa industria portuguesa era, como dicían en Matrix, un fallo do sistema», comenta Alfonso Blanco, produtor da serie.
ANOs DE EXPERIENCIA E CALIDADE
Blanco conta que o papel das plataformas na auxe do «Galician noir» foi facer chegar a máis audiencia un tipo de contido que xa existía en Galicia e debido a esta aposta xorden novos acordos e a industria segue medrando. Porén, para que este pequeno milagre da distribución sucedese, fixeron falta anos de experiencia e produtoras que apostaran polo contido en galego de calidade. «Isto non pasa dun día para outro, as produtoras levamos moitos anos facendo as cousas ben. Cando estaba de moda a comedia fíxose Matalobos ou Serramoura e cando o mercado internacional comezou a pedir thrillers soubemos facelos. Produciamos tan ben que era unha mágoa que ese contido non viaxase por todo o mundo», conta Alfonso Blanco. A produtora de Vaca Films concorda: «El audiovisual gallego se ha construído con una base sólida. Somos singulares y hemos dado buena talla».
Pero que ten o thriller para gustar tanto? Ghaber Jaber sinala que seguidores fieis: «A quen lle gusta, ve todo, non importa o país de orixe, como pasou coas series nórdicas». Está claro que para fans do thriller ou non, queda moito galician por ver e moitas historias por descubrir.