O programa Cultur-On, promovido pola Xunta, contará con exposicións en museos, espectáculos, proxeccións audiovisuais e obradoiros en bibliotecas. «Nunca houbo en Galicia tanto consumo cultural como agora», apunta o conselleiro de Cultura
28 jul 2023 . Actualizado a las 05:00 h.Ata catro millóns de euros destináronse en Galicia para incentivar o consumo de actividades culturais na comunidade. Co lema «A Cultura de Galicia é un CulturON», a Xunta trasladou o seu interese para que cada ano foran máis os galegos que elixan estas actividades dirixidas ao crecemento intelectual das persoas. Desta forma, ampliaron a programación de eventos neste verán de 2023. Pais, nenos, adolescentes, xente de todas as idades poderán gozar de cantidade de actividades como festivais, exposicións en museos, proxeccións audiovisuais e obradoiros en bibliotecas, entre outras moitas cousas.
Unha inversión necesaria para a Xunta e os concellos que se envorcará na riqueza intelectual dos galegos. No que incumbe aos museos, poderás atopar ata 60 exposicións repartidas por toda Galicia. Ademais dotaranse de diversas actividades, ata 200, entre as que estarán as conmemorativas do Seminario de Estudos Galegos (Luz na terra no Museo Centro Gaiás, na cidade da Cultura de Santiago).
Non faltarán as visitas guiadas e divulgativas, así como obradoiros para familias e nenos. Tamén coincide que este ano se fan 30 anos da creación do Centro Galego de Arte Contemporánea (CGAC). En conmemoración do aniversario ofrecerase un amplo abanico de actividades para todos os públicos. O 29 de setembro decorarán o edificio emblemático da Cidade da Cultura con concertos, bailes e incluso proxeccións.
Este verán, a exposición de Cidades no tempo tocaralle á Coruña, dende agora ata rematar o mes. Da cidade herculina trasladaranse ata Vigo, a última parada deste percorrido que xa pasou por outras cinco estacións nas diferentes capitais da comunidade. Con isto, volven reivindicar outro ano máis a Galicia urbana na identidade e cultura galegas.
Para calquera público
En paralelo, as artes escénicas e musicais tamén gañan terreo. Dentro dos plans destas vacacións fíxose especial fincapé na dinamización rural en Galicia. Así, Territorio Cultura xa ten previstos medio centenar de espectáculos. Ao que lle segue Cultura no Camiño con 300 actuacións escénicas e musicais. Este verán os artistas non van parar quietos, farán actuacións en 88 municipios nos que brindarán música, maxia, teatro e moitas máis propostas con numerosos artistas invitados. No mundo da danza acudirán os habituais de Danza 3 con espectáculos como o de Xacarandaina, O Fiadeiro e Cantigas e Agarimos.
Sen esquecer os festivais, este ano o FEST Galicia asóciase con grandes organizacións como Rompetiño, Vive Nigrán, Festival Sinsal e 17° Ribeira Sacra, todos dotados de artistas nacionais e internacionais.
Pero non todo vai ser festa, CulturOn substitúe Netflix por películas ao aire libre. Aproveita e goza de programas como Redecinema, no que xunto coa colaboración da Xunta habilitarán espazos nos que poderás tombarte en modo pícnic a entreterte con proxeccións cinematográficas en cantidade de concellos. Entre as obras audiovisuais estarán Cuñados, Melancolía, a Galiña Turuleca e moitas mais. Estas películas funcionan como ferramenta perfecta para fusionarse coa lingua e cultura galega.
Pero como en Galicia non te podes fiar do tempo, tamén dispoñerás de cineclubs en diversos municipios, grazas á colaboración da Federación de Cineclubs de Galicia. Tratarase de ciclos que durarán nalgúns casos máis dunha semana.
As scape rooms están de moda e non podían faltar na programación de plans deste período estival. O Circo do Silencio pasará por Arzúa esta semana e por Ordes a seguinte. A quen lle guste unha boa aventura poderá poñerse a proba desta sala de fuxida instalada no interior dunha carpa circense da que tan só se poderá saír se resolves os misterios que se che expoñen, en equipo, durante o percorrido. Con isto CulturOn pretende fusionar o traballo da mente co deporte, de forma que á vez poidas seguir uns hábitos saudables.
Neste sentido, Os Bolechas Deportistas viaxan no tempo serán tamén os que te farán suar á vez que aprendes da lingua e a súa riqueza. Estes chegarán ata 15 concellos, onde teñen como obxectivo indagar na beleza da cultura.
E para rematar, pero non por iso menos importante, o papel das bibliotecas vai ser tamén crucial neste plan cultural. Nos centros públicos daranse 800 actividades como contacontos, monicreques, música ou cine. Ademais de contar cunha Furgoteca (biblioteca móbil) con obradoiros de alfabetización dixital, mais scape rooms e clases de escritura creativa e ilustración. Pero como non, o circuíto de Feiras do Libro que en agosto fará parada na Coruña, Viveiro, Foz e Monforte de Lemos.
Non hai escusa para o aburrimento. O conselleiro de Cultura, Román Rodríguez afirmou: «Nunca houbo en Galicia tanto consumo cultural como agora». Así que non quedes atrás.