O xiro radical do destino de Gabri Veiga deixa varias interrogantes. Sempre se dixo que os futbolistas, con contrato ou sen el, remataban xogando onde querían e esa teoría queda agora baixo sospeita cando un axente top se cruza do teu camiño. Tamén hai quen leva as mans á cabeza pensando que fai un rapaz de 21 anos nunha liga de segundo nivel (polo momento), pero cadaquén é libre de tomar as súas decisións e como apuntaba Rafa Benítez, coa operación deixa despexado o futuro económico para varias xeracións da familia Veiga. O porriñés vén dunha familia de traballadores e seguro que sabe o que custa gañar un soldo.
Dende o sábado, cando Benítez deu por feita a súa saída, deberon pasar moitas cousas e na maioría delas todo apunta que tivo moito que ver Pini Zahavi. No fondo, e por moi famosos e influentes que sexan, para algúns non deixan mercancía que poñen no escaparate para o mellor postor e o mellor comisionista.
Outra reflexión debería ser interna e debería facela a patronal de clubs. Hai tempo que a liga española deixou a ser a referencia, pero cada día que pasa, perde máis o paso con ligas menores, algunhas delas, con sospeitosas fontes de financiamento.