Creo que encaixar goles no último minuto pode ser por falta de concentración e igual, mentalmente, algo de predisposición a estas catástrofes. Estas cousas pasan moitas veces no fútbol e semella que o deporte está sento moi cruel co Celta, pero tamén considero que os xogadores teñen culpa con erros individuais, con falta de concentración nas marcas, entra o medo... É unha mestura de todo.
Neses últimos minutos, parece que o equipo está máis pendente de defender e non cometer erros e iso fai que te vaias metendo atrás, que non tomes riscos á hora de saír cara adiante e moitas veces, se non deixas pensar, se apertas adiante, tes máis facilidade de defender despois.
No caso concreto do gol de Machís, suponse que nesa zona tiña que saír cara adiante para taparlle o disparo, porque golpeou só. Creo que aí existe un erro de non encimar ao rival. Alguén tiña que estar cubrindo esa zona. Neste caso, descarto completamente que sexa responsabilidade do porteiro.
Para corrixilo, o Celta ten que ser quen de manter a concentración, non cometer erros e incidir moito no traballo deses últimos minutos, porque cando cometes un erro tantas veces, non che queda máis remedio que aprender.
Creo que no adestramento se poden ensaiar moitas cousas, pero non se pode adestrar a competición e a súa tensión. Nese caso, ou estás ou non estás preparado. É certo que te podes preparar mentalmente e que existen profesionais que che poden axudar nestas situacións, pero ao final é responsabilidade individual de cada un. Ademais, penso que estas cousas van minando e fan que te metas nun bucle onde parece que todas as desgrazas che pasan a ti ata que un día gañas no 95 e dáste conta que todo está na cabeza.
Entendo que esta situación está afectando moito e o vestiario vese débil neste momento en vista das súas declaracións. Estalle pasando factura.