A vila lucense, con gran tradición celtista, non é allea o bo momento que vive a afección do Celta, e froito diso nace esta nova agrupación
09 dic 2025 . Actualizado a las 17:42 h.Na vila lucense de Chantada chegou a haber mesmo dúas peñas, cre lembrar Manuel Moure, responsable de Celta Sacra, a nova que acaba de nacer recentemente neste municipio de longa tradición celtista. A última desas agrupacións caera xa hai tempo na inactividade e nun momento de gran florecemento do afección celtista, alí tampouco eran alleos. «Somos xente nova que, igual que o celtismo está medrando en todas partes, aquí tamén viamos esa tendencia e por iso demos este paso», di.
Cunha directiva que anda polos 30 anos de media, non teñen vinculación coas anteriores agrupacións chantadinas, senón que son celtistas máis novos e que se introducen neste mundo dos colectivos celtistas federados. A idea vén dos últimos dous ou tres anos e hoxe -desde hai varios meses- Celta Sacra xa é oficial. «Empezamos a ver como cada vez máis xente de Chantada ía a Vigo, a ver os partidos de Balaídos, e comezamos a organizarnos para facilitalo e non ter que coller un coche todos cada vez que iamos. O ideal sería poder ter un bus no futuro, como outras peñas», sinala Moure.
Así, aínda que levaban tempo cavilando o proxecto, foi en verán cando deron «o paso en serio e definitivamente». «Tivemos algunhas xuntanzas con xente que sabiamos que podía estar interesada e constituímonos oficialmente», conta. Unha das primeiras cousas era saber con que número de integrantes podían estar en condicións de arrincar. «Queriamos saber canta forza tiñamos e en outubro abrimos un mes para que a xente se inscribise. Polo de agora, somos máis de 60, o cal está bastante ben para o tempo que levamos», valora.
Partindo desa media dos 30 anos, intentan «estender a peña a todo o celtismo de Chantada, empezando polos contactos máis directos», que son máis desa idade, pero tratando de «chegar a todos os sectores da sociedade para que a xente de idade máis avanzada tamén saiba da existencia da peña e teña cabida». Así, teñen pais con fillos xente que estivo nas anteriores peñas e «retoma con ilusión agora este proxecto». Reúnense para os partidos na súa sede, La Cervecería, tanto para os de fóra como para os de casa, pois teñen integrantes que están na lista de espera para ser abonados. «Así, tamén todos os maiores chantadinos celtistas podan ir ver todos os partidos».
Un aspecto importante sempre que nace unha peña é decidir como se vai chamar e foi algo que no seu caso tamén se abordou en varias xuntanzas. «Falamos de varias opcións e os que estabamos cremos que Celta Sacra era o máis oportuno. Enviouse despois a idea por WhatsApp, gustou e decidimos non darlle máis voltas. A idea era axilizar os trámites e avanzar, tirar para adiante despois de tempo pensando en crear a peña. E estamos todos satisfeitos», conta sobre a denominación elixida.
Precisamente a Ribeira Sacra protagonizou en datas recentes un documental feito por Celta Media. «Desde o interior, como somos nós, celebramos que o equipo, máis alá da cidade de Vigo, intente cada vez máis potenciarse como ese equipo de Galicia. Estamos moi orgullosos e sentíndonos moi identificados», comenta este celtista de 23 anos cuxa afección comezou, sobre todo, a raíz da salvación do 4 % do ano 2013. «Xa tiña amigos celtistas e fomos collendo esas ganas de ver ao Celta. Fomos a varios partidos antes de ser socios e, finalmente, no centenario, un amigo e mais eu demos o paso», lembra. Querían poder ir a todos os partidos e a partir de aí, coñeceron a máis xente de Chantada coa que, de non ser pola afección común do celtismo, seguramente non terían relación, sostén.
Moure non pertencera ás anteriores peñas celtistas de Chantada, pero si a Merlegos Celestes mentres estudou en Santiago. «Tamén me serviu para ver como funcionaba unha peña e traer ideas sobre que cousas podemos facer», revela. Nese sentido, a súa vocación é «facer o maior número de actos posibles para os chantadinos». Salienta que comezan con moitas ganas e ilusión e tamén agradece a acollida por parte doutras agrupacións celtistas a través das redes sociais.Contan, así mesmo, con que cando chegue o momento da inauguración, iso lles sirva para establecer máis vínculos; por agora, non hai data, xa que hai dependen máis do club que deles mesmos e o gran momento do celtismo fai que sexan varias as peñas pendentes de poder celebrar o seu evento de posta de longo.