Aínda que naceu en Panamá, José Manuel Mosquera González vive na Barrela, en Carballedo. Ten vinte e nove anos e traballa como profesor na Escola de Música de Chantada, onde toca o clarinete.
-¿Cantos anos levas tocando este instrumento?
-Vinte. Empecei na banda de Carballedo.
-¿Ven moi difícil o solfexo os alumnos?
-Teño alumnos entre os oito e os vinte e catro anos. O solfexo non é difícil, ensinándolles ben, aínda que teño que dicir que os alumnos que veñen xa teñen algúns coñecementos de música. Eu ensínolles a tocar o clarinete.
-¿Entraña moita dificultade?
-Ten a súa dificultade, pero con esforzo e constancia obtéñense bos resultados.
-¿Cantas horas habería que dedicarlle a este instrumento?
-O ideal serían cinco de media na etapa de estudante.
-¿Cal sería unha boa idade para iniciarse?
-Aos seis ou sete anos para coller nocións e introducilos; e aos oito para empezar a coller xa un instrumento.
-¿Seica tes pensado dar un concerto proximamente?
-Si, en Carballedo este fin de semana e a actuación será no salón de actos do Concello.
-¿E o próximo onde será?
-O seguinte será en Chantada, xa no mes de agosto, pero de momento aínda estou buscando un lugar.