As festas dedicadas ao produto máis típico do Courel celebraranse o 7 de novembro e o 6 de decembro
29 oct 2009 . Actualizado a las 02:00 h.No municipio do Courel están a prepararse actualmente as dúas festas de exaltación da castaña que se celebran durante a temporada de outono. A primera delas será a edición número 22 da Festa da Castaña do Courel, que se celebrará o 7 de novembro e que este ano terá por escenario a localidade de Seoane. A segunda é a undécima Festa da Pisa da Castaña, que organiza en Froxán a asociación cultural Fonte do Milagro e que se celebrará o 6 de decembro.
O primeiro dos festexos será organizado pola asociación de hostaleiros Serra do Courel e contará coa colaboración do Concello. Seguindo o esquema habitual, pola mañá ofrecerase unha degustación gratuíta de castañas e viño e durante a xornada haberá unha serie de actuacións musicais. Á unha e media do mediodía será pronunciado o pregón, que aínda non se sabe a cargo de quen correrá. A alcaldesa Lola Castro reuniuse onte pola tarde cos organizadores do festexo e quixo despexar as dúbidas sobre a súa celebración que tiñan moitos veciños, segundo explicou. «A raíz do cambio de goberno municipal correron rumores de que este ano non habería festa, pero iso non é certo», sinalou. «Como de costume, a organización corre a cargo da asociación á que lle corresponde organizar a festa cada ano e o Concello limítase a apoiala», engadiu.
Polo que respecta á Pisa da Castaña, os organizadores aínda non terminaron de elaborar o programa, pero xa adiantaron que entre os actos estará a presentación do novo libro do escritor courelao Xesús Manuel Marcos, quen acaba de publicar a segunda parte da súa novela xuvenil de aventuras O?????brindo de ouro . No acto participará Manuel Bragado, director de Edicións Xerais, a editorial que publica este libro.
O acto principal do festexo será unha vez máis a recreación etnográfica do proceso tradicional de preparación das castañas secas. O programa da xornada comprende ademais un xantar popular a base de produtos tradicionais da serra.