Mañá rematan as homenaxes ao grupo Valle-Inclán, que existiu no municipio entre os anos 60 e 70
08 ene 2010 . Actualizado a las 02:00 h.O grupo da Aula de Teatro do Concello de Lugo representará mañá no auditorio de Escairón -ás 20.00 horas- Historia dunha escaleira , adaptación da primeira obra do dramaturgo español Antonio Buero Vallejo. Con esta representación conclúen os actos de homenaxe que o Círculo Saviñao organiza en memoria do grupo teatral Valle-Inclán, que existiu no municipio entre 1969 e 1979 e que supuxo un importante revulsivo cultural na comarca de Lemos.
A peza que se representará mañá en Escairón foi precisamente unha das primeiras que representou o antigo grupo de teatro, que se distinguiu por un especial coidado á hora de escoller os textos cos que montaba os seus espectáculos. Durante os dez anos que durou a súa actividade, a compañía puxo en escena La camisa , do dramaturgo galego de lingua castelá Lauro Olmo, Divinas palabras e El embrujado , de Valle-Inclán, e moitas outras pezas de diversos autores contemporáneos, desde o norteamericano Arthur Miller ata o galego Jenaro Marinhas. Un dos seus maiores éxitos foi a comedia Los caciques , de Carlos Arniches, da que se fixeron dúas montaxes.
Nos primeiros anos do grupo, que foron tamén os últimos do franquismo, estas iniciativas -como calquera espectáculo público nesa época- debían contar coa aprobación da censura. Neste contexto adverso, a compañía fixo gala dun espírito avanzado escollendo autores e temáticas que en principio podían despertar o receo dos censores.
Por outro lado, aínda que as súas primeiras representacións foron en castelán, o grupo incrementou co tempo o uso do galego e chegou a representar pezas traducidas a este idioma desde outras linguas.
O grupo teatral estivo formado principalmente por estudantes e xente nova, polo que a súa actividade se limitaba sobre todo aos períodos vacacionais. Pese a estas limitacións, consegiudesenvolver un intenso labor e caracterizouse tamén pola laboriosa preparación das súas escenografías.