Coa finalidade de poñer en valor a produción de setas na provincia e difundir a súa importancia ambiental, económica e culinaria celebraranse mañá e o sábado no Pazo de Feiras de Lugo as terceiras Xornadas sobre micogastronomía, presentadas onte pola vicepresidenta da Deputación, Lara Méndez; o presidente da Sociedade Micolóxica Lucus, Julián Alonso; o director do Cetal, Eduardo Vidal; e o presidente da Asociación Provincial de Hostalería, Cheché Real.
As xornadas, que contarán cuns 200 participantes, incluirán sesións teóricas e prácticas, nas que intervirán profesionais da cociña e expertos no mundo das setas ensinando dun xeito práctico as técnicas e múltiples opcións que presentan os cogomelos na cociña, sen esquecer a importancia de sensibilizar no respecto e sostibilidade deste recurso natural dos nosos bosques. O presidente da Sociedade Micolóxica Lucus abrirá as xornadas coa conferencia Os mellores cogomelos comestibles e as súas confusións tóxicas.