Representantes de oito carnavais tradicionais galegos participarán na apertura do Entroido Ribeirao de Chantada, que comezará a celebrarse o 9 de febreiro co denominado Domingo Lambedoiro. Os festexos abriranse ás 11.30 horas desa xornada cun desfile polas rúas da capital municipal no que tomarán parte os personaxes típicos dos entroidos de Salcedo -A Pobra do Brollón-, Esgos, Viana do Bolo, Bande, A Mezquita, Campobecerros -parroquia do municipio de Castrelo do Val-, Ribadetea -en Ponteareas- e Samede, no municipio de Paderne, da comarca de Betanzos.
A celebración do Entroido Ribeirao, como é habitual, comezará ás 16.00 horas na parroquia de Santiago de Arriba. O festexo continuará na mesma localidade e co mesmo horario de inicio o día 16 -Domingo Corredoiro-, o 23 -Domingo de Entroido- e o 25, Martes de Entroido. Os festexos terminarán este último día coa cerimonia denominada «choro do pucho».
Por outro lado, a asociación Amigos do Entroido Ribeirao, que se encarga de organizar as festas, anunciou o programa do novo ciclo festivo mediante un letreiro provisto dun código QR que indica a ubicación exacta do campo do Moredo, o lugar da parroquia de Santiago de Arriba onde se celebra o entroido.
A participación dos personaxes típicos doutros carnavais tradicionais de Galicia é habitual no festexo chantadino desde hai varios anos.
A asociación organizadora tamén ten tomado parte noutras celebracións similares dentro e fóra de Galicia.