A Pobra do Brollón prepárase para unha semana enteira de concurso de tapas

A Pobra do Brollón prepárase para unha semana intensa de sabor coa edición número 16 do seu Concurso de Tapas da Guimaralia, que se celebrará desde este venres, 28 de novembro, ata o venres 5 de decembro. Cinco establecementos de hostalería das localidades da Pobra do Brollón e Salcedo competirán polo favor do público coas súas creacións, nunha iniciativa que serve de prólogo á festa de cantos de taberna que se celebrará o sábado 6 de decembro.

Os establecementos participantes son o Avenida, A Vella Taberna, o Primeiro de Maio e O Pirata, na Pobra do Brollón, e A Salanova, na parroquia de Salcedo. Para garantir a calidade e o cumprimento das bases, os cociñeiros profesionais Diego Martínez e Martín Mantilla xa realizaron unha cata previa de todos os pinchos que se ofrecerán ao público.

A mecánica do concurso mantense fiel á súa filosofía de votación popular. Os clientes que degusten as tapas -cun prezo único de 1,50 euros- poderán votar pola súa favorita nunha tarxeta que deberá ser selada por todos os bares participantes. Ademais de decidir así quen merece o primeiro, segundo e terceiro premio, cada voto serve como participación nun sorteo final: un circuíto termal para dúas persoas no Hotel Balneario Iberik Augas Santas de Ferreira de Pantón.

O horario para disfrutar desta rolda gastronómica será de 12:00 a 14:00 horas ao mediodía e de 19:00 a 22:00 pola tarde. Unha vez pechada a votación o día 5, a festa continuará o sábado 6 de decembro coa XIII edición dos Cantos de Taberna, que comezarán ás 18:00 horas, poñendo o broche musical a unha semana dedicada ás tapas, a tradición e o bo ambiente na Guimaralia.

---

---

---