O Correlingua reúne en Monforte a uns seiscentos alumnos do sur da provincia
MONFORTE DE LEMOS
Estudantes de oito centros educativos de tres municipios participaron nas actividades que se desenvolveron no Parque dos Condes
24 may 2024 . Actualizado a las 17:54 h.Arredor de seiscentos alumnos de varios centros educativos do sur da provincia participaron este venres en Monforte no Correlingua, a tradicional serie de carreiras reivindicativas a prol do idioma galego. O acto principal celebrouse ao mediodía no anfiteatro do Parque dos Condes, onde se ofreceu unha actuación do grupo Mekánika Rolling Band, que o ano pasado gañou o Cantalingua —un certame musical paralelo a esta iniciativa— coa canción Maruxaina. O acto foi presentado polo actor e humorista Fran Rei, quen reivindicou o dereito de «vivir en galego os 365 días do ano».
Os centros educativos que participaron nesta actividade foron os institutos Daviña Rey, A Pinguela —de Monforte—, Val do Asma —de Chantada—, os colexios monfortinos Ferroviario, A Gándara, Escolapios e Infanta Elena e o colexio Ricardo Gasset do municipio do Incio. Os grupos que tomaron parte na actividade fóronse acercando a pé antes do mediodía ao Parque dos Condes, nalgúns casos levando pancartas e coreando o lema do Correlingua deste ano: «Dende aquí até acolá, galego xa!». Os alumnos do instituto A Pinguela encargáronse da lectura dun manifesto a favor do uso do galego no ensino e noutros ámbitos sociais.
O acto contou coa participación de Efrén Castro, vicepresidente da Deputación lucense, entidade que colabora na organización da actual edición do Correlingua. A xornada é promovida pola asociación cultural Correlingua co apoio da Mesa pola Normalización Lingüística, a Asociación Socio-Pedagóxica Galega e CIG-Ensino, así como coa colaboración das deputacións de Pontevedra, A Coruña e Ourense, ademais dos concellos de Lugo, Ourense, A Coruña, Pontevedra, Vigo, Santiago e Ferrol. Castro celebrou a iniciativa, que —segundo afirmou— «pon o foco na reivindicación do uso do galego entre a xuventude e a rapazada, e que o fagan dun xeito festivo, sen prexuízos e gozando de todo o que teñen que ofrecer o galego e a cultura». Desde a Deputación sinalan así mesmo que os obxectivos do Correlingua son «a reflexión sobre a situación da lingua e a importancia de activar as accións a prol dela, sensibilizar a sociedade, a través da poboación infantil e moza, da importancia da defensa da lingua e asociar o uso do idioma a actividades colectivas, lúdicas e de interacción entre o alumnado de diferentes centros».
Un ciclo que acabará o mércores en Burela
A actual edición do Correlingua arrancou na Coruña o pasado día 3 cunha festa celebrada ao pé da Torre de Hércules. Desde entón organizáronse outras actividades deste tipo nos municipios de Narón, Bueu, Lugo, Ourense, Santiago, A Estrada e Vigo.
A xornada celebrada en Monforte será seguida doutra que terá lugar o luns na Alameda de Pontevedra. O ciclo deste ano pecharase o próximo mércores na praza de Mariña de Burela, onde actuarán o actor, compositor e escritor Paco Nogueira e o grupo musical Cuarta Xusta, que quedou clasificado en segunda posición no certame Cantalingua deste ano coa canción Presumo de galego. O primeiro posto foi para a banda A Gramola Gominola polo tema Superlingua e en terceiro lugar quedou Mekánika Rolling Band coa canción Miña nai.
O Correlingua deste ano comprende ademais outras iniciativas, como a realización dun vídeo de regueifas ou cantos improvisados no que participan varios centros educativos e uns obradoiros de escrita creativa.