O monumento pasará a formar parte da ruta literaria creada no municipio no 2023
08 jul 2025 . Actualizado a las 11:14 h.O Concello de Quiroga inaugurará o próximo día 18 unha estela dedicada ao poeta Uxío Novoneyra que estará instalada diante do inmoble do antigo establecemento comercial El Derroche. Neste lugar, explican os responsables municipais, « o poeta courelao esperaba o autobús para saír destas terras cara a calquera destino». O monumento incorporarase á ruta literaria creada no 2023 e dedicada a varios escritores naturais do municipio ou vinculados con el. Tanto a creación da ruta como a instalación de esta son financiadas polo consorcio da Ribeira Sacra dentro do seu plan de sostibilidade turística.
Por outro lado, o día 18 ofrecerase ademais un percorrido guiado por esta ruta que comprenderá actuacións musicais e que se organizará en colaboración coa Fundación Legar. Será entre as 10.00 e as 14.30 horas. Para participar hai que inscribirse antes do día 17, ben na Casa de Cultura, no teléfono 982.43.51.25 ou no enderezo cultura.quiroga.quiroga@eidolocal.es.