A Xunta arranxará nove quilómetros da desastrosa estrada de Becerreá a Sarria
BECERREÁ
Licita por 711.415 euros as obras de mellora e sinalización, que durarán seis meses
24 mar 2021 . Actualizado a las 18:32 h.A Consellería de Infraestruturas e Mobilidade licitou as obras de reforzo do firme ao longo de nove quilómetros da estrada LU-636 ao seu paso polo concello de Becerreá, ás que destina un orzamento de 711.415 euros.
O delegado territorial da Xunta, Javier Arias, explicou que está previsto actuar desde o punto quilométrico 22 ata o 31,140, situado á entrada do núcleo de Becerreá. O prazo de execución estimado dos traballos é de seis meses.
Arias, acompañado por persoal técnico da Axencia Galega de Infraestruturas (AXI), presentou este mércores o proxecto de acondicionamento deste treito da LU-636, unha vía que conecta Becerreá con Sarria e discorre tamén polos termos municipais de Baralla e Láncara.
Segundo destacou, a intervención inclúe a reparación das partes deterioradas e a reposición do firme en toda a calzada con tratamento asfáltico e rego de selado. Nos últimos catro quilómetros ata acceder á localidade becerrense aplicarase mestura bituminosa en quente en todo o ancho do carril.
Así mesmo, nos tramos en curva instalaranse barreiras e cunetas de seguridade polas marxes interiores. Posteriormente, renovarase a sinalización horizontal en todas as zonas de actuación.
Desde hai anos conductores e veciños de Becerreá, co seu alcalde á fronte, demandaron a mellora desta estrada que une a vila con Sarria. Hoxe mesmo estivo na presentación deste arranxo o rexedor, o ex do PSOE Manuel Martínez. O actual firme ten numerosos baches, non hai elementos de seguridade, están sen pintar e as curvas son peligrosas. Esta vía é necesaria para os veciños da comarca de Sarria que queren conectarse cos municipios dos Ancares e coa A-6 para ir cara a Meseta ou A Coruña.
Por otra parte, o delegado sinalou que esta intervención está incluída nun proxecto de reforzo do firme en tres estradas autonómicas que tamén contempla melloras na LU-546, de Nadela a Monforte, e na LU-741, na Pontenova. Todas estas obras saen hoxe a licitación por un importe total próximo a 1,7 millóns de euros. As empresas interesadas en presentar ofertas poden facelo ata o 19 de abril.
