CARLOS G. REIGOSA DE SOL A SOL
11 dic 2000 . Actualizado a las 06:00 h.Estados Unidos tivo que aceptar a inmigración masiva de persoas calificadas polos seus coñecimentos no ámbito da nova economía, ó carecer de recursos humanos propios abondo preparados. Silicon Valley e Miami son dúas mostras incontestables. E Europa terá que seguir a mesma senda (uns 200.000 especialistas por ano) se non se reforman os sistemas educativos e se axustan para satisfacer as necesidades reais de cada país e, no noso caso, de España. Se isto non se fai a tempo, o paradoxo resultante pode ser verdadeiramente chamativo: o insuficiente número de españoles calificados para cubrir as novas demandas laborais deberá ser complementado cunha inmigración ben preparada que percibirá, en xustiza, os soldos -moitos deles privilexiados- do sector. O exemplo está á vista en California: indios (da India), mexicanos, brasileiros, rusos e chineses compoñen a elite que fai funcionar a nova economía. A conclusión é elemental: o desenvolvemento cultural e educativo é a base do éxito na nova orde económica global. Por isto, non caben escusas nin demoras na adecuación do noso ensino.