XOSÉ CARLOS CANEIRO
22 sep 2004 . Actualizado a las 07:00 h.Chamábanlle el ente e nunca souben o motivo. Ata hai catro días. O pasado domingo, noite, todas as miñas dúbidas desfixéronse como un lábil fío de Ariadna. A gala de presentación da nova programación de TVE foi todo un símbolo dos novos tempos. Non sei se quedarme co desnudo de Ana Obregón, cos chistes zafios referidos a Aznar, coas loas á directora xeral ou co tamaño do órgano e a súa escasa importancia (segundo insiste a presentadora dun programa de sexo para as noites do xoves). TVE, que pagamos todos, deu un gran impulso ao novo talante. O Zapaterismo instalouse na tele pública a golpes de progresía: esa corrente ideolóxica rancia, máis obsoleta que un soneto a Millán Astray. A progresía, o domingo, fixo que pensáramos en Urdaci, en José Luis Moreno, en Sardá e a súa inminente entrada en TVE. Qué bochorno. Qué espectáculo mediocre, banal, necio, ramplón. Pero a intelectualidade correcta da correcta España garda silencio. Criticar a Aznar é un merito. Pero á directora xeral de Radiotelevisión hai que paseala baixo palio. A independencia intelectual nesta España é misión imposible. Sinto náuseas. Declárome obxector. Declárome disidente. A corrección política e el ente venceron. Gloria a eles.