MÁIS DE mil cen millóns de dólares gastou xa EE.?UU. en instalacións militares en Irak, o que parece contradicir as reiteradas afirmacións oficiais de que non teñen intención de establecer alí bases permanentes. Recentemente, ademais, así o expresou a France Presse o embaixador en Bagdad, Zalmay Jalilzad. Aos dez días da invasión, The New York Times xa dixera que a mesma tiña por finalidade garantir as bases militares que lle permitisen proxectar a súa influencia no Oriente Medio, e aludía xa a catro delas moi importantes. Non se trata, pois, de nada novo. Unha cousa é o que se di e outra o que se fai. Pero algúns pensan que os invasores vense recluídos e illados nesas bases porque a resistencia lle impide toda acción fóra delas. Son as únicas áreas que controlan no país. O cal á súa vez, dise tamén, quere dicir que os invasores están metidos nunha trapela de difícil saída, pois malo se quedan e malo se, nas circunstancias actuais, se van. En calquera caso, o fracaso USA non pode ser máis humillante.