A o longo da historia déronse moitas razóns para intentar demostrar a superioridade dos varóns sobre as mulleres. Díxose que son máis intelixentes, que teñen máis capacidade de traballo, máis dotes de mando e máis forza física. A falsidade das tres primeiras demostrouse cando cambiaron as circunstancias sociais para as mulleres, pero a última é un feito innegable. A traxedia ocorrida na capital de España no centro Madrid Arena demostrouno unha vez máis: houbo cinco vítimas, catro delas mortais, e todas foron rapazas. Foron asfixiadas e esmagadas por unha avalancha humana na que había homes e mulleres, pero ningún rapaz morreu nin sufriu feridas.
Nas grandes catástrofes había unha regra que sobre todo nos naufraxios se respectou: «As mulleres e os nenos primeiro». E tamén había unha regra social, antes moi interiorizada nos varóns, ata o punto de parecer un instinto, que os levaba a protexer a unha muller ameazada. Hoxe parece que se perdeu. E cando prende o pánico o instinto de supervivencia é máis forte que calquera regra moral ou social.
Por desgraza o único que se pode facer en casos como o do Madrid Arena é regular as condicións para que non se produzan situacións de pánico. Pero esta diferenza entre homes e mulleres si se debe ter en conta ao lexislar para todo o que se refire a violencia doméstica, violacións ou ataques ás mulleres: eles, sen ningún xénero de dúbida, teñen máis forza.