Quero escribir algo alegre, como debera ser o verán. Pero cústame. Os temas que dominan o xornal son José Blanco, Luís Bárcenas, Pescanova, pornografía infantil? Cóanse Anxo Guerreiro, Nelson Mandela e Tito Vilanova, pero tampouco poden aportar nada ledo. Así que paso as páxinas buscando unha boa nova. Teño que saltar tamén a climatoloxía, pois a ausencia de anticiclón non nos vai deixar ir á praia.
Que mal está o país. Un non ten dereito a nada. Nin á liberdade, se me descoido.
Que llo pregunten a Yohan Piedagnel, que estivo no cárcere pola presunta vinculación co dobre crime do muíño de Cambados, no que foron asasinados os primos Ricardo e José Ángel Feijoo. Así pasou tres anos. Pero o o fiscal xefe retirou os cargos que pesaban sobre o francés ante a falta de probas que o incriminasen. Agora pide unha indemnización que o Estado rexeita concederlle.
Aínda podía ser peor. Dalelv, unha moza norueguesa que traballaba en Dubái, denunciou á policía que fora violada unha noite. O resultado foi unha detención e un xuízo cunha condena de 16 meses de cárcere. Pero non se equivoquen, que o culpable non resultou o violador, senón ela. ¿A causa? Manter relacións sexuais fóra do matrimonio, falsa testemuña e consumo de alcohol.
Con todo. Segue a preocuparme moito máis que xa haxa cen mil familias galegas subsistindo grazas á axuda de familiares e amigos.
Inténtoo, pero é difícil alegrarlles o día.