Pagarano coa vida

Jorge Mira Pérez
Jorge Mira O MIRADOIRO DA CIENCIA

OPINIÓN

16 abr 2017 . Actualizado a las 05:00 h.

Un médico con moita experiencia en aparato dixestivo comentábame hai meses que ao principio da súa carreira operaba moitos cancros de estómago. Engadía que, co paso dos anos, foi vendo a baixada da súa incidencia e a subida do colorrectal. No Sergas sábeno e comezaron un programa de cribado masivo de cancro colorrectal, dirixido a persoas entre 50 e 69 anos. Baséase nunha proba moi sinxela, que fai cada persoa na súa casa pinchando nas feces cun bastonciño que mete logo nun frasco. O Premio Nobel de Medicina Harald zur Hausen, durante unha visita a Galicia no ano 2014, xa insistiu no bo dos cribados de certos cancros coma o de cérvix ou colon, ao lembrar que tardan anos en desenvolverse e no seu camiño, mesmo antes de aparecer, van deixando uns sinais que poden detectarse. No caso do colorrectal, saen unhas feridas que poden sangrar ao paso das feces, e aí está a idea da proba: se nelas hai sangue, soa a alarma e hai que facer unha colonoscopia. 

A proba, malia ser sinxela, ten boa fiabilidade. Sorprendentemente máis da metade das persoas rexeitaron facela. Sinto dicir que algunhas delas pagarán coa súa vida esa insensatez. Se un non detecta a tempo esas feridas van medrando e, cando finalmente aparecen síntomas fortes, en moitos casos desgraciadamente xa non hai remedio. 4 ou 5 persoas de cada 100 que a rexeitaron levan dentro unha lesión premaligna, que poderá converterse nun cancro. Se iso é así, lamentarán non ter dedicado no seu momento un minuto para facer a proba do bastonciño.