As palabras significantes. O Ano Santo contén unha espiritualidade esencial na Igrexa católica. O Ano xubilar, desde unha perspectiva laica, podería servirnos para formular coas institucións europeas a busca da renovación do «ser de Europa», baseada na solidariedade e a inclusión. O Xacobeo é un proxecto conmemorativo de Galicia, promovido pola Xunta e que implica outras administracións; Compostela 2021-2027 debería ser un programa de cultura e reformas urbanas con soporte no Concello e no Consorcio de Santiago.
Os camiños de Galicia. O Xacobeo é para toda Galicia, pero os Camiños de Santiago son os recoñecidos polas administracións e as institucións europeas, incluído Vigo, como sendas históricas de peregrinación que esixen unha consideración particular do peregrino para que non terminen sendo circuítos competitivos e banais. Teño andado por illas e praias sinalizadas como Camiño de Santiago. Se todo é camiño, adeus Camiño.
As cifras e as paixóns. Pensar nunha magnitude de dez millóns de visitantes pode alimentar unha burbulla que abre as portas a un paraíso de riqueza fácil. Por manexar algunha cifra, a capacidade da catedral en fluxo continuo son tres millóns ao ano, e o abrazo ao Apóstolo un millón. A maioría dos que veñan vai querer ver tamén a catedral restaurada. Que facer se o entusiasmo segue inflando as cifras?
A Compostela receptora. A cidade histórica demanda unha proposta especial para 2021, sobre todo na administración do espazo público: mobilidade nas prazas e rúas que rodean a catedral, na Praza de Galicia e a ronda histórica, as terrazas, o fluxo da carga e descarga; tamén na xestión do patrimonio: rede museística, itinerarios alternativos ou algo tan elemental como a cartelería de plástico que invade os paramentos pétreos; e, como non, na racionalización do fenómeno global do aloxamento turístico. Admitamos dunha vez por todas que o mercado por si só non regula a paixón inmobiliaria e tomemos nota das medidas que as grandes capitais están a implantar.
O acordo imprescindible. Semellante reto esixe un consenso municipal, porque un goberno en minoría non pode afrontalo só. Unha maior cooperación coa Xunta e a Igrexa, implicando a cidadanía, os emprendedores, os guías turísticos… A convocatoria do Real Padroado empeza a ser un anhelo ante tanta complicación electoral, pero non debería ser impedimento para que o Consorcio teña preparado un programa e empece a buscarlle soporte económico coas outras administracións.
Dúas palabras gregas poden expresar o que debería ser o ano 2021. Énfase, un acento renovado na cultura e na convivencia. Sofrosine, un equilibrio entre sociedade e economía. O importante non é que veñan cantos máis mellor, senón que sigan vindo outros animados polos que antes visitaron Galicia.