Os mesmos que se aledan con saña da marcha de Pablo Iglesias quéixanse agora de que Joe Biden nos adiante pola esquerda ao propor a liberación de patentes das vacinas contra a covid-19. Os mesmos que nunca permitirán que se cuantifique o número de persoas mortas ao berro de «saúde ou liberdade» e que buliron mercar os paquetes «turísticos» que os levaban a Turquía a vacinarse. Son esas contradicións de snobs, en fin, as que acaban dando un dubidoso acubillo racional á industria farmacéutica, a máis inmoral de cantas poboan este planeta, que se aproveita coma ningunha outra da desinformación e, sobre todo, a caradurez de vender aos sistemas públicos a prezo de ouro o que xamais conseguirían sen os recursos proporcionados por estes. O máis inxusto capital ampárase na compra-venda da saúde, como saben desde hai décadas enfermos de hepatite, cancro ou malaria, para quen iso chamado «medicinas» bate con esoutro concepto relativo polo que a eles, que pagan os impostos cos que se financia a investigación farmacéutica, xamais se lles preguntou: «rendibilidade». Pero velaí Biden, a quen non parece fácil insultar (Bolivariano? Galeguista? Independentista?) propondo o que a verdadeira esquerda propuxo en canto se publicaron os resultados das primeiras vacinas.
Ten graza que o mesmo día que o seu presidente dá este paso, Carolina do Norte recuperase o pelotón de fusilamento para as execucións. As farmacéuticas, por motivos éticos, néganse a proporcionar o cóctel da inxección letal. Como o len. Así que Biden, que seguramente verá como uns soldados disparan no paredón a algún negro inocente, saca a máscara ás farmacéuticas como no seu día fixo Lula no Brasil. Pero tranquilos, snobs: non pasou nada.