En 2023 houbo 293 mortos afogados no mar, case todos en praias. Por internet circula un vídeo onde un experto en primeiros auxilios dille a un home que foi arrastrado por unha corrente de resaca que se tenta nadar contra corrente para chegar á praia, cansarase, non chegará e morrerá. O que ten que facer, explícalle, é flotar, deixarse levar pola corrente ata que esta termine. As correntes teñen unha anchura que vai de 15 a 50 metros. Cando senta que a corrente cesou poderá saír polos laterais, dereita ou esquerda, e aproveitar correntes de retorno que lle axudarán a chegar á praia.
Moi pouca xente ten a forma física e mental para manter a calma cando estás a ser arrastrado mar dentro e cada vez máis lonxe do punto de partida. O vídeo ten máis de cinco millóns de reproducións e polo menos un dos comentarios di que lle salvou a vida. A min gustaríame insistir nas recomendacións previas: non bañarse nunca con bandeira vermella. E, se estás surfeando e caes nunha corrente, tentar manterse na táboa porque desde ela é máis fácil saír.
Hai uns días, un garda civil que estaba fóra de servizo coa súa familia na praia do Grau, en Castellón, viu que a corrente levaba tres menores. Lanzouse á auga , e tras el outras dúas persoas. O garda civil conseguiu levar os nenos cara a unhas rocas, fóra da corrente, pero tivo que ser auxiliado el mesmo porque, de nadar contra corrente, esgotouse e case afogou.
E por último: se caes nunha corrente, levanta os brazos coas mans abertas e móveos de arriba abaixo: é un sinal universal de que necesitas axuda. Con sorte, alguén pode verte e chamar para que te recollan.