É a pregunta destes días, contando con que —previsiblemente— o presidente do PP non logre os votos necesarios para que o Parlamento lle encargue formar Goberno. A pregunta correcta é que vai facer Feijoo de non ser investido? As especulacións corren por todas partes, dentro do PP, nos outros partidos e nos medios de comunicación. Os vaticinios están envoltos en argumentos extraídos de augurios, síntomas e suposicións, pero o único que sabemos é que o futuro non está escrito. Non somos os historiadores dados a facer predicións, así que non entrarei nese trelo. Nin sequera pode asegurarse, tendo en conta o pasado, que non haxa sorpresas na votación. Din os que están na cerna da deboura informativa capitalina, que a opción dos tránsfugas é imposible por moito que o PP a reclame publicamente e lle dea descaradamente amparo. Aconteceu con Esperanza Aguirre e por iso resulta difícil pensar en alguén que queira emular a Tamayo e Sáez, intentouse cando a última investidura presionando sen éxito ao deputado de Teruel Existe; todo sumado fai que a sorpresa sexa —aparentemente— imposible. Xa veremos, cando os poderes da dereita española se empeñan en levar as cousas ao extremo teñen demostrado que poden levalas. Poñamos que falo de Madrid.
O relevante é a especulación en si mesma. Significa que hai dúbidas sobre que Feijoo vaia continuar dirixindo o PP se non logra o encargo parlamentario de formar Goberno. Quererán substituílo como gustan de facer correr moitos na vila e corte? A segunda parte da pregunta é quen o quere fóra? A terceira por quen poderían substituílo? As olladas apuntan a Ayuso ou a Moreno Bonilla. Pero xa sabemos que Esperanza Aguirre intentou por terra, mar e aire acabar con Rajoy no pasado e fracasou. Ayuso logrou acabar con Casado pero pouco puido facer para decidir o substituto. Deduzo que o PP, pese á retórica, é un partido tan complexo como esta España plurinacional que negan, pero entenden, e con moi pouca vocación suicida. A outra alternativa parece tan plausible como inmadura. Feijoo fartouse de maiorías absolutas en Galicia, pero Moreno Bonilla foi quen de lograla por primeira vez en corenta anos en Andalucía. Iso acredítao no conxunto do PP, digan o que digan na Porta do Sol, pero necesita máis tempo.
Nin idea do que fará Feijoo. El non foi a Madrid para isto, a súa baza era a economía e entenderse con vascos e cataláns ou lograr sumar 176 deputados con Vox. O primeiro saíulle mal porque a economía vai ben. Para o segundo non se dan as condicións. Porén, intentouno e mellorou os resultados do partido e que os neofalanxistas estean dispostos a votalo en calquera condición, eles saberán por que. Non abonda. De non ser investido —como parece— quédalle a opción da repetición electoral ou liderar a oposición como fixo en Galicia cando tiña case vinte anos menos, xogando a baza dunha lexislatura curta, pois as eleccións vascas, galegas e cataláns do ano que ven afectarán ás bases do Goberno central. Nin se pode pingar antes de asar, nin amortizar sen capital. Xa veremos.