Non coñezo de nada o veciño de Rianxo que foi multado por solicitar que o atendesen en galego nun centro de saúde. Todos podemos ter un mal día e alterarnos, pero a dicir verdade, todas as declaracións que lle vin facer a este home foron calmadas e nun ton correcto e educado. Non teño motivo para dubidar da súa versión.
O que ninguén nega é que el foi facer un cribado, neses tempos nos que a covid nos tiña atemorizados. Solicitou ser atendido en galego... e armouse! A persoa a quen se lle requiriu este dereito fixo caso omiso e, segundo o afectado, chamouno «paleto». A Policía Local agardábao á saída da proba para denuncialo. E vaia se o fixeron! Puxéronlle unha sanción económica elevada.
Non vou entrar noutro tipo de feitos e cualificacións, porque non teño certeza exacta do que aconteceu. Pero propoño o seguinte: imaxinemos que a situación sexa que un doente solicite ser atendido en castelán.
Ata aí todo pode ser posible. Pero imaxinar o resto... xa se complica. Que o cataloguen de pailán e o denuncien por alterar a orde pública por falar castelán resulta de ciencia ficción, verdade?
Imaxinen a sorpresa se a cuestión prospera e lle chega unha notificación cunha multa de 600 euros. E se logo a xustiza lle dá a razón, aínda queda a oportunidade de sancionalo por faltar ao respecto aos axentes da Policía Local. Non vaia pensar a xente que pode saír indemne de reclamar un dereito.
Unha vez máis, ponse de manifesto que galego e castelán non gozan da mesma consideración social.