O comezo do curso académico supón tamén o inicio das actividades educativas do Proxecto Terra, a iniciativa de divulgación arquitectónica e aprecio do territorio impulsada dende hai 25 anos polo Colexio de Arquitectos de Galicia. Cando no inicio do século o arquitecto e profesor de secundaria Xosé Manuel Rosales lle comentou ao colexio a posta en marcha desta iniciativa docente, tiña claro que a comprensión da arquitectura, o respecto polo territorio e a defensa do medio ambiente non podían ser só unha tarefa do noso colectivo: facíase imprescindible xerar unha conciencia social, que implicase o profesorado e chegase ás idades máis novas. Só dese xeito se podería mudar a raíz dos nosos problemas.
Dende entón, decenas de miles de nenas e nenos e case dous milleiros de docentes formaron parte das diversas actividades educativas e de concienciación desenvolvidas en centros de toda Galicia. Para facelo posible, a Administración autonómica, con distintas cores políticas e a través de diversas consellerías, non deixou de apoiar economicamente o proxecto, demostrando que a preocupación polo territorio e a posta en valor do patrimonio ten que ser un esforzo colectivo e continuado.
Este novo curso supón o inicio dunha nova etapa. Simbolicamente, o Proxecto Terra fai 25 anos, unha cifra que invita a facer balance e buscar retos. Xunto co respaldo da Consellería de Vivenda, a reincorporación da Consellería de Educación supón un incentivo para redefinir parte dos contidos que se levan ás aulas e, como sempre, seguir innovando. Problemáticas como a escaseza de vivenda, a presión turística nalgunhas cidades ou os riscos medioambientais aos que nos enfrontamos como país cómpren ser explicados tamén á infancia. Porque non se trata só de crear conciencia sobre o valor do que temos, senón de xerar actitudes futuras máis comprometidas co territorio e arquitectura a medio prazo.
Os proxectos educativos e divulgativos tenden a ser breves e, en moi contadas ocasións, son capaces de perdurar máis dunha xeración. Se o Proxecto Terra chegou ata aquí é porque sempre foi un proxecto adiantado ao seu tempo. Tanto que aínda hoxe moitas das bases que o sustentan están a ser formuladas como desexo de futuro a través da iniciativa New European Bauhaus da Unión Europea.
Agora que a baukultur, o concepto que define unha arquitectura e urbanismo máis comprometidos co social e co entorno, empeza a estar asentada, cómpre reivindicar o carácter innovador do Proxecto Terra, que hai 25 anos naceu precisamente dende esa perspectiva. E cómpre, por suposto, confiar en seguir avanzando, sen límites e sen medo, apoiándonos nas vindeiras xeracións, cara a construción dun país mellor.