A misoxinia é un sentimento de odio e desprezo ás mulleres. Dáse predominantemente en homes, pero tamén hai mulleres misóxinas, que odian e desprezan a outras mulleres e mesmo a si mesmas. É un sentimento moi complexo.
Cando se incautaron os audios que Koldo García, exasesor do exministro de Transportes Ábalos, tiña gravados no seu estudio, quedou de manifesto o desprezo co que se referían non só ás mulleres da súa contorna, prostitutas ao parecer, senón ás mulleres en xeral. Nun deles di: «Si es con una camisa con botones, lo que hay que hacer es llevar el de tirantes, poner el pecho hacia el borde, abrir los botones, o uno... O la de lino que es transparente totalmente y que se vea el pezón por delante y buscar posiciones sin querer, cualquier posición que pueda venir bien para que se pueda ver la teta o se pueda ver culo o se pueda ver el dinero...». Noutro di: «Si os tiro un billete de 500 y te agachas delante mí». Que quere dicir? Que unha muller se pon a catro patas diante del por 500 euros?
Ademais de misóxinos, maltratadores e corruptos, non saben nin falar un castelán correcto. Son catedrática de Literatura Española e non podo evitar fixarme niso. Paréceme estar a oír un discapacitado mental ou un tipo ao que hai que enviar á escola de párvulos para que lle ensinen as regras de gramática máis elementais.
Vaia xoia de ministros e asesores. Unha verdadeira vergoña para o país que, en certo xeito, representan. A España de Cervantes, de Rosalía de Castro, de Pardo Bazán, de Antonio Machado merece mellores ministros.