Na praza da vila hai sete carpas que ofrecen pinchos orixinais na Festa do Peixe O concurso de tiro ó prato volta hoxe ó seu sitio orixinal, o Alto do Iermes
01 jun 2007 . Actualizado a las 07:00 h.Os Magic Fingers ou dedos máxicos, un grupo de xóvenes da vila, tocaron a ritmo de ranchera e a alcaldesa en funcións, Ana Belén Vázquez, cortou a cinta sostida por José Luis Baltar, entregándolle o cacho de tela ó seu marido e futuro alcalde de Bande. Así deste xeito sinxelo comezaba a 34 edición da Festa do Peixe na praza da Constitución. Sete carpas para ofrecer empanadas, chourizos, licores, viños e platos de ortigas, peixe, troita e queixo do que se fai en Santa Comba ben con leite de vaca ou das tes explotacións de cabras con 350 cabezas cada unha que hai no municipio. «Queremos que o visitante disfrute desde hoxe ata o domingo probando o peixe», sinalou Vázquez. O xeito de preparar o peixe é adobándoo durante uns días con pemento picante e despois cun pouquiño de allo. Hainos que fritir con aceite ben quente para que se tosten e bótaselles o sal. E á troita haille que pasar o touciño polo lombo. Total, que o Concelllo ofrece 400 kilos de peixes pescados en todo un mes e 300 kilos de troita. «Esperamos poder esgotar as existencias, este ano é primicia este formato da festa e esperamos seguir subindo», sinalou a alcaldesa en funcións. Os pinchos están ben deliciosos. A tarde resultou soleada e agradable e pola noite houbo queimada para todos. Os máis deportistas andan no maratón de fútbol sala. «Esta fiesta me parece muy bien, que la gente se pone más alegre olvidando problemas. A mí me gusta más el pescado de mar», dicía Miguel López, un xubilado que disfrutaba sentado co seu amigo José Medela. «Eu alégrome da festa, fun ferreiro e non pesquei nunca, Á festa asistimos eu e a familia» comentaba este veciño. «Eu se podo veño sempre a esta festa. Non lle teño segredo para preparar o peixe. Ou ó forno ou frito sen máis complicacións e gústame ben. Inda eses días regaláronme unha bolsiña de peixes de aquí», sinalaba Teresa Armada. A súa amiga, Josefa Martínez, considérase unha cociñeira «mediana» cos peixes. «Unhas veces saenme ben e outras non tanto. O outro día cocín bacalao, boteille aceite e allo e sabía que pelaba. E ó peixe dos nosos ríos non lle teño unha receta especial», explicaba. A festa seguirá hoxe co campeonato provincial de pesca desde as oito da mañá. A media tarde haberá tiró o prato no Alto do Iermes, como se facía anos atrás. Foron mirar no sitio e entre os toxos estaba intacto o mnuro para esta práctica. Así que volve a proba aló enriba. Á noite actuará a orquestra de Toni Pérez y Los Arquinos nunha praza xunta á que hai algunhas atraccións. Todo queda concentrado no centro desta vila que quere dar máis pulo ó peixe se ben a festa grande local é o San Roque en agosto. Esta fin de semana é boa excusa para ir a Bande e, de paso, ver os seus encantos históricos.