A Fundación Alfonso Martín Escudero elexiu Ourense como sede para un observatorio sobre a corrupción pública. Presentouse a iniciativa nun acto no que participou o rector da Universidade de Vigo e as dúas institucións colaborarán para desenvolver os estudios correspondentes, ademais de organizar conferencias, charlas, cursos e outras iniciativas. E, non por citalo de último menos importante, desenvolverase a actividade académica e investigadora para saber máis sobre este fenómeno e buscar solucións para o mesmo. E todo iso con vocación estatal.
Non é para envexarlle o chollo a quen o leve, un profesor do Campus, pero se o colle con paixón mesmo vai acabar derreado. O TSXG recoñeceu estes días que hai máis casos que nunca, falamos de Galicia, de políticos e cargos públicos investigados; un xornal europeo de prestixio fixo público hai nada un informe no que sinalaba a Andalucía como a comunidade autónoma máis corrupta do Estado e a cada semana que pasa aparecen máis casos de financiación ilegal de partidos, comisións, algún cargo público que pagou campañas dun dos grandes partidos cun feixe de billetes de 500 euros que seica lle deu a súa nai e moitas máis cousas. Para non colapsar antes de tempo, ao mellor o seu é ir de menos a máis, por aquilo de ser un observatorio estatal. Primeiro hai que pedir o informe dos famosos enchufes da Deputación, logo os da outra parte, máis tarde o mapa da corrupción que foi elaborando Leo Bassi... e así pouco a pouco. E, moi importante, hai que crear un número gratuito, como a Policía, para aportar datos confidencialmente. De certo que o petamos.