O xefe de servizo de control das enfermidades transmisibles da Consellería, advirte de que hai que seguir vacinándose de adultos e manter un alto porcentaxe de poboación vacinada para protexerse fronte a certas patoloxías
13 dic 2019 . Actualizado a las 17:10 h.Que pasa se deixamos de nos vacinar? A resposta está clara para José Antonio Taboada Rodríguez, xefe de servizo de control das enfermidades transmisibles da Consellería de Sanidade: «Teremos os problemas que elimina a vacinación, individuais para as persoas que poden padecer esas enfermidades, e a nivel poboacional. Sería un retroceso de moitos anos». Taboada expuxo estes razoamentos na conferencia da Academia Médico-Quirúrgica en Ourense. En Galicia, a porcentaxe de vacinación é alta -case do 100 % en nenos- pero o conferenciante apunta que hai que mellorar no nivel de adultos vacinados. «Hai un concepto novo. As vacinas aportan beneficios ao longo da vida. As do calendario infantil hai que actualizalas. O calendario de vacinación actual non se parece ao de hai dez anos», expón Taboada. No horizonte de dous anos espérase que se empece a utilizar a vacina para a varicela zóster e estase preparando o sistema para ver se se introduce no calendario. «As vacinas son o medio que máis aportou en saúde. É o fármaco quizais máis seguro do panel de fármaco do sistema», salienta Taboada fronte aos «sectores que defenden que son prexudiciais». A morte dun neno por difteria en Cataluña ou os problemas que hai en zonas de Europa polo sarampelo evítanse coa vacinación.