Os cociñeiros ourensás Javier Outurmuro e Paco Gómez participan nunha misión comercial no país nipón
10 may 2025 . Actualizado a las 05:00 h.A cociña ourensá ten un sabor propio e estes días podeno disfrutar en Xapón. A Asociación Amigos da Cociña Galega está a levar a cabo no país nipón unha misión institucional e gastronómica. Ata Toquio se desprazaron os cociñeiros Javier Outumuro, Paco Gómez e Orlando Pérez Silva. Dende onte e ata o domingo, os chefs ofrecerán sesións dirixidas a profesionais do sector gastronómico e turístico xaponés, con menús que incluirán pratos emblemáticos como o polbo á feira ou o cocido galego, ademais de produtos con denominación de orixe como queixos, viños ou pan artesanal. «Levamos os froitos da nosa terra a Xapón para compartir o mellor de Galicia, e moi especialmente de Ourense, que é a autenticidade do noso produto, a forza da nosa tradición e o valor cultural da nosa cociña», explicou Javier Outumuro, presidente da asociación.
Os tres cociñeiros galegos que se atopan en Xapón teñen unha dilatada traxectoria. Javier Outumuro, de A Taberna de Ourense, é un chef comprometido coa gastronomía tradicional e distinguido con galardóns como a Medalla de Prata de Galicia ou o Premio Nacional de Gastronomía. Paco Gómez, de Pulpería A Feira, de Ourense, é un mestre pulpeiro gañador do Campionato de Parrilla de Carta de Atlántica Gastronómica. É un referente da tradición pulpeira e da innovación culinaria. Orlando Pérez Silva, de Mesón Rías Gallegas de Madrid, completa a delegación galega.
Entre os produtos que viaxan a Xapón atópanse unha coidada selección de alimentos con denominación galega e que farán que ata 17 empresas locais teñan proxección neste mercado. Hai productos tradicionais, como é o caso do polbo precociñado de Frigoríficos Arcos, queixos artesáns de Feijoo, carnes de porco de Coren ou pan galego de Selecpan. Tamén se completa a cesta con produtos doces de outono, como é o caso do marrón glacé, castañas en almibre ou crema de castaña, de Cuevas Marrón Glacé. Non faltan viños das denominaciones de orixe Ribeiro, Monterrei e Valdeorras.
Esta misión, que conta co apoio da Deputación de Ourense e da Confederación Empresarial de Ourense (CEO), forma parte do proxecto Cociñeiros polo mundo, co que a asociación levou a cociña galega a cidades como Nova York, Miami, Montreal ou Toronto. O obxectivo, segundo explican, é claro: «Reivindicar o valor do produto galego nun mercado con alto poder adquisitivo e crecente interese pola cultura gastronómica europea». Hai que ter en conta que ambos países teñen lazos simbólicos, a través de camiños irmandados como é o caso de Kumano Kodo e a Vía da Prata, que conecta directamente a provincia de Ourense co Camiño de Santiago.