Antonio Núñez, edil tránsfuga de Manzaneda: «Non é normal saber do que se fai polas redes sociais do Concello»

Antonio Núñez é o voceiro dos dous tránsfugas socialistas que xuntaron as súas firmas ás dúas dos edís do PP para presentar unha moción de censura contra Amable Fernández, o rexedor co que no 2023 se presentaron ás eleccións municipais en Manzaneda. Sen que lle moleste o apelativo de tránsfuga, tampouco lle dá máis importancia. Di que se se animou a dar o paso foi «porque a xente tamén mo pedía». Conta que incluso o teñen chamado veciños para instalo a mudar a situación. «O populismo de Amable cada vez ía a menos», asegura.

—En xullo vostede e Miguel Domínguez pasaron ao grupo de non adscritos, por que non presentaron a moción entón?

—Daquela foi para darlle un toque de orde a Amable. Estaba farto de avisalo durante dous anos de que tiña que cambiar esa forma de gobernar el só cun técnico. Era unha oportunidade para que cambiara, porque todos temos dereito a ter fallos. Porque entendo que cando levas moitas cousas na cabeza, non atendes a ningunha.

—Foi sempre así, un goberno en solitario?

—Desde o minuto un gobernou só. Non é normal que saibamos das cousas que se fan polas redes sociais do Concello, incluso de temas das nosas concellarías. Eu paseime ao grupo mixto coa intención de que nos chamara para colaborar, e apoiariámolo ao 100 % nas decisións importante e as non importantes, sempre que foran consensuadas. Pero nada. Nin sequera nos chamou para preguntar por que nos foramos [do grupo de goberno]. Eu non tiña intención de facer moción de censura ningunha, pero estanse perdendo subvencións, dúas que eu teña coñecemento, e hai outras cousas... Xa está ben. Haberá que darlle un cambio a isto.

El PP se une a dos tránsfugas del PSOE para conseguir la alcaldía de Manzaneda

María Cobas

—Que pacto teñen co PP?

—De apoialos. Imos traballar en conxunto para facer as cousas máis próximas aos veciños, traballar para todos por igual. Son unha serie de cousas nas que coincidimos co PP para que isto funcione e siga un bo camiño, non un de autoritarismo que non sabemos cara onde vamos nin de onde vimos.

—Cando decidiron que era o momento de facer a moción?

—Fará 20 días ou un mes.

—Foi fácil entenderse co PP?

—Non foi difícil porque teñen ganas de traballar e comunícanse con nós.

—Vanse integrar no Partido popular?

—De momento estamos para facer o traballo. Non é algo que teña pensado, pero tampouco tiña pensado facer a moción. Pensei que [Amable Fernández] ía recapacitar e consensuar as cousas con nós, pero ao contrario, cada vez peor.

—Falaron de dedicacións exclusivas ou parciais para o que resta de mandato?

—Tocamos todos os temas un pouco e en principio non vai haber dedicacións.

—O pacto é de apoiar a Pedro Yáñez como alcalde, sen rotación.

—Si. Vai ser el o alcalde todo o tempo. Eu serie probablemente o tenente.

---

---

---