Centos de persoas quixeron acompañar ao personaxe do entroido na súa primeira saída
03 mar 2025 . Actualizado a las 05:00 h.Houbo un tempo no que os veciños de Laza cocían bica branca cando chegaba o entroido para ofrecerlla como agasallo aos peliqueiros, o personaxe típico da festa na localidade, e de paso tamén a probaban o resto. Iso vai anos que mudou e agora a bica branca é un doce que se pode degustar calquera día do ano, pero en entroido sigue tendo un sabor especial. É por iso que aínda que ninguén se ten que vestir de peliqueiro ou agardar pola data para botarlle o dente, o reparto de bica o domingo de estrea segue a ser unha tradición viva coma se non tivera pasado o tempo.
Onte era o día, o primeiro no que saen os peliqueiros. É, polo tanto, o personaxe que máis tarda en deixarse ver, xa que chega co entroido metido xa nos seus días grandes. É unha demora que se fai longa, de aí o abarrote habitual no momento da saída da misa. É entón cando empeza a escoitarse o son das chocas que di que agora é o momento da diversión, da irreverencia e da troula. Vistos os peliqueiros, tocaba a entrega do agasallo doce, tarefa da que se encargaron varias mulleres vestidas co traxe tradicional galego que chegaron nunha carroza que en cuestión de minutos quedou rodeada de xente. Bica para todos no medio dun ambiente festivo que estivo marcado por un domingo solleiro.
Hoxe pola mañá será a farrapada e pola tarde a baixada da Morena, co baño de formigas. Hai que ir preparado para saír sucio.