O Concello busca sensibilizar á cidadanía máis nova sobre a importancia da igualdade de xénero
21 feb 2025 . Actualizado a las 05:00 h.O Concello de Ribadavia impulsa o concurso «Debuxa Igualdade» co obxectivo de sensibilizar á cidadanía máis nova sobre a importancia da igualdade entre mulleres e homes en todos os ámbitos da sociedade.
A iniciativa está dirixida ao alumnado de primaria dos centros escolares do municipio, establecéndose tres categorías segundo os cursos: Categoría A para primeiro e segundo de primaria, Categoría B para terceiro e cuarto de primaria, e Categoría C para quinto e sexto de primaria. Os participantes deberán elaborar un debuxo en soporte cartolina ou folio con total liberdade técnica. A temática xirará arredor da igualdade entre mulleres e homes, podendo representar situacións no ámbito familiar, social, laboral, educativo ou deportivo. Ademais, os traballos poden incluír un eslogan ou lema.
Os debuxos deberán entregarse nos centros escolares ata o 17 de marzo. O fallo do xurado darase a coñecer o 19. Haberá un premio por categoría, consistente nun vale de 80 euros para gastar en librarías de Ribadavia.