A MIT de Ribadavia pecha as súas portas coa beleza escénica da obra «Bach» da compañía Mal Pelo

A Mostra Internacional de Teatro de Ribadavia (MIT) despídese este sábado cun programa que mestura ironía e emoción estética. Ás 20.00 horas, na Casa da Cultura, María Jurado presentará Spooky, unha proposta na que dúas mulleres constrúen un dispositivo escénico a partir dos códigos do cinema de suspense e trash (lixo). O espazo teatral preséntase como a metáfora dun cerebro: un lugar ao que chega a información, os patróns, as proxeccións, as imaxes que as crenzas sobre o individuo constrúen dentro de cada un.

O broche final da MIT 2025 chegará ás 23.00 horas no castelo, coa recoñecida compañía Mal Pelo, de María Muñoz e Pep Ramis, que, entre outros galardóns, obtivo o Premio Nacional de Danza na categoría de creación no ano 2009 e a Medalla de Oro da Academia de las Artes Escénicas de España, no 2022.

Achegan a Ribadavia Bach, unha obra que funde música, movemento, mirada e ritmo, grazas a unha selección de preludios e fugas contados nos libros que conforman O clavecín ben temperado, do compositor Johann Sebastian Bach e que María Muñoz —creadora e intérprete— representa grazas á danza e cun rigoroso traballo sobre a linguaxe do movemento.

Na primeira versión completa da peza, estreada no Festival Temporada Alta 2005 de Girona, a gravación minuciosa e exhaustiva realizada polo pianista canadense Glenn Gould (1932?1982) acompañaba á bailarina, achegando unha corporalidade insólita: a do propio pianista, que coa súa respiración e murmurios semellaba estar presente na escena. En Ribadavia presentase coa versión gravada interpretada por Glenn Gould.

Bach representouse máis de 150 veces dende a súa estrea, ademais de en España, en países como Marrocos, Canadá, Inglaterra, Alemaña, Xordania, Siria, Austria ou Francia.

---

---

---