Xinzo pecha o ano Casares coa entrega do premio de portada para «Vento Ferido»

Xinzo de Limia tamén puxo fin ao ano Carlos Casares. O fillo adoptivo da vila foi onte o gran protagonista na gala celebrada no auditorio Ángel Cocho, na que José González Joga recibiu o premio de portadas para Vento Ferido. Non hai data para unha futura publicación da obra, mais o Concello lanzou a convocatoria ao cumprirse 40 anos da súa primeira impresión.

No acto tamén se entregou o premio de xornalismo literario, que foi parar a Afonso Vázquez Monxardín. «Son certames que contribuirán a perpetuar e divulgar os vínculos de Carlos Casares co lugar no que viviu unha das etapas vitais máis felices», segundo Miguel Santalices, presidente do Parlamento de Galicia, que secundou a invitación do alcalde, Antonio Pérez, para acudir á gala de onte á noite. Santalices tamén tivo palabras para os gañadores. De Vázquez Monxardín dixo que era máis que un profesor. «É un autor brillante, un erudito caracterizado por unha capacidade innata para transmitir os seus vastos e variados coñecementos humanísticos». De José González destacou a súa capacidade creativa. «Despois de ver unha mostra da súa capacidade creativa, podemos estar tranquilos, porque Ourense seguirá a ser, no futuro próximo, terra de moitos e bos artistas plásticos», dixo o presidente do Parlamento de Galicia.

Santalices dedicou parte da súa intervención a recordar a Carlos Casares. «Foi unha persoa especialmente comprometida coa autonomía de Galicia e coa normalización da lingua galega desde unha óptica de racionalidade e moderación, como a que impregna o galeguismo difuso ?que moitos nos honramos en profesar- propugnado polo seu amigo e compañeiro Ramón Piñeiro», dixo.

O acto rematou co concerto da coral De Ruada, dentro da xira que está facendo pola provincia este ano.

---

---

---