O Museo ten aberta unha mostra sobre a obra de Pereiro
17 may 2011 . Actualizado a las 06:00 h.Toda a comarca celebra hoxe, con diversos e variados actos, o Día das Letras Galegas e ao autor que homenaxea, Lois Pereiro (1958-1996).
En Pontevedra, a Plataforma Queremos Galego convoca un acto en defensa da lingua, ás 12 horas na praza da Peregrina baixo o lema «Paremos os ataques contra o galego». Haberá unha lectura pública de textos a prol da lingua galega e rematarase cun manifesto. Tamén pola mañá, dende ás 11 horas, na avenida de Santa María, haberá o Festival de Xadrez Letras Galegas, organizado pola Asociación de Veciños Santa María e a Escola Xadrez Pontevedra.
Homenaxe popular
Como ven sendo tradicional, a Asociación Socio Cultural O Burgo levará a cabo un acto popular de homenaxe ao poeta de Monforte, ás 20 horas, na praza de Curros Enríquez, diante da alfombra floral que os veciños do devandito barrio confeccionarán pola mañá. O acto contará coa actuación de grupos de gaitas e máis da Banda de Música de Pontevedra, e inclúe un recital poético e a actuación da Coral Polifónica de Sobradelo, Vilagarcía, e do coro da propia asociación de O Burgo. Tamén dará a benvida o presidente do colectivo, e o alcalde dirixirá unhas verbas aos asistentes. A homenaxe rematará cunha recepción no local social do Burgo, na rúa de Manuel Murguía,1,
Pola súa banda, a sala de investigadores do Museo de Pontevedra ten aberta, ata o 10 de xuño, a mostra que a institución organiza todos os anos dedicada ao escritor homenaxeado pola Real Academia Galega. Autor de pouca produción literaria, pero intensa, Lois Pereiro, cuxa mirada estética enlaza coa literatura centroeuropea, inicia os seus pasos literarios de moi mozo. Formou parte do grupo de escritores e artistas que en Madrid editaron a revista Loia, con catro números aparecidos entre 1975 e 1978, nos que intelectuais que contemplaban Galicia desde o exterior, como Patiño, Menchu Lamas, Manuel Rivas ou Xosé Ramón Pereiro, buscaban renovar as artes e as letras.
As súas obras e os estudos dos seus biógrafos compoñen a mostra, con primeiras edicións pertencentes aos fondos do propio Museo, pode visitarse de luns a venres, de 9 a 14 horas.
Na localidade de Marín, Queremos Galego organiza tamén unha lectura colectiva de textos, a partir das 12 horas, no palco da Alameda. Ademais, procederase a entrega dos premios convocados polo Concello, ás 17 horas, no Museo Manuel Torres. Actuará o cuarteto de música tradicional Picuiña.
En Raxó tamén se entregarán os premios do concurso literario Xaime Isla Couto convocado polo Concello de Poio entre os escolares do municipio. Será ás 17.30 horas, no centro cultural, que acollerá por primeira vez esta actividade. Pero antes, pola mañá, no peirao, haberá unha carreira popular pola lingua, con premios para os tres primeiros clasificados de todas as categorías de idades.
Romaría en Sanamedio
En Bueu, celebrarase durante todo o día a romaría das Letras Galegas, no adro de Sanamedio, en Bon, Beluso. Haberá una misa solemne ás 11.30 horas, cantada pola Coral Polifónica de Beluso, que ofrecerá logo un concerto. A escritora Asun Estévez lera o pregón, ás 12.45 horas, e despois, actuará a Banda de Gaitas Manxadoira de Bueu. Pola tarde comezarán os xogos populares a actuación das pandereteiras A Quinta Ferreña de Beluso, o grupo de baile Anxuiña de Marín e A Ghaita do Avó, tamén de Marín.
Na carballeira de Caldas está previsto, para ás 19 horas, un concerto de música coa Banda de Caldas, a Coral Polifónica de Caldas e a Agrupación Folclórica As Burgas. Ademais, a asociación veciñal Vía XIX Santa María, celebra unha comida de confraternidade no local social da parroquia, amenizada polo trío Sabor e con sorteo de agasallos. Está prevista a participación de máis de 140 veciños.
En Sanxenxo, a praza de Pascual Veiga acolle, ás 20 horas, un concerto da Banda de Música, que baixo a dirección de Rafael Torres, interpretará música de autores galegos, coa intervención como solista do gaiteiro J. Manuel López, Josele. Pola súa banda, o Taller de Memoria Municipal súmase a celebración cun recital de poesía e unha lectura de escritos realizados polos propios alumnos, ás 19 horas, no Círculo Cultural de Vilalonga. Contará tamén coa actuación das Cantareiras de Portonovo.