O director de Agadic, Jacobo Sutil, debuxou na feira pontevedresa as liñas mestras do Hub Audiovisual
28 nov 2021 . Actualizado a las 05:00 h.A industria dos videoxogos é un dos sectores culturais no que está volcada a Xunta de Galicia, tal e como expuxo este sábado o director Axencia das Industrias Culturais (Agadic), Jacobo Sutil, quen, acompañado por Manuel Rey e Luz Castro, secretario e tesoureira de Videoxogo.gal, debuxou no Culturgal as liñas mestras do Hub Audiovisual. Na sesión interviñeron representantes de catro destacadas empresas galegas para abordan os proxectos que están a ultimar: Intruder in Antiquonia, de Aruma Studios; The Waylanders, de Gato Studio; Super Woden GP, de Víctor Justo, e Rai, de Wood Games.
Estes catro proxectos, en palabras do representante da Consellería de Cultura, Educación e Universidade, son un reflexo do talento creativo, técnico e empresarial arredor dos videoxogos na comunidade. Por iso, a Xunta «traballa na primeira iniciativa autonómica de fortalecemento e vertebración dun sector con gran capacidade de crecemento», engadiron dende a Administración autonómica. De feito, trátase dun dos principais eixos do Hub Audiovisual que o Goberno galego acaba de poñer en marcha cun orzamento de 9,6 millóns do Fondo Europeo de Desenvolvemento Rexional (Feder), dentro do eixe React-UE do programa operativo Feder Galicia 2014-2020, como parte da resposta da Unión Europea á pandemia.
O Hub Audiovisual ten como obxectivo reforzar a posición de Galicia como referente competitivo e de calidade no contexto global. Isto determinou que o sector dos videoxogos sexa destinatario dun polo de aceleración empresarial e dun fondo específico para o desenvolvemento de proxectos, ademais doutra serie de accións transversais.
Dende a Xunta precisaron que os destinatarios do polo de aceleración serán os emprendedores e empresas novas para contribuír a axilizar a saída ao mercado dos seus produtos e, en consecuencia, a súa consolidación. Esta iniciativa materializarase a través dun convenio cunha duración de vinte meses desde a súa posta en marcha.
En canto ao fondo de desenvolvemento, disporá dunha liña de subvencións dotada con 400.000 euros destinada ás produtoras galegas.
Pola súa banda, hoxe presentarase o Hub Audiovisual da Industria Cultural como apoio para atraer rodaxes.
Entrega do Premio Nortear a Pedro Rodríguez Villar
Durante a sesión deste sábado, procedeuse á entrega do sétimo Premio Literario Nortear a Pedro Rodríguez Villar pola súa obra O amor das pedras. De igual xeito, presentouse unha nova edición do Premio María Victoria Moreno.
A Xunta avoga por unha programación descentralizada
O secretario xeral de Cultura, Anxo M. Lorenzo, abordou as liñas estratéxicas da programación cultural do 2022: «Porá o foco na revitalización do sector, con propostas diversificadas e descentralizadas para que a cultura chegue a todos os lugares».