Kiko da Silva: «Había historietas que sería imposible expoñer ao público»
PONTEVEDRA
O pontevedrés é o comisario da exposición centrada na obra do artista Peter Bagge, «Todo o mundo é imbécil menos eu»
22 may 2022 . Actualizado a las 05:00 h.Falar de Peter Bagge é falar dun dos nomes propios do cómic undergroud estadounidense. Non só é falar do creador de Odio ou de Mundo idiota, senón dun creador capaz de darlle un aparente xiro de 180 graos a súa carreira para adentrarse na vida dalgunhas das mulleres pioneiras menos coñecidas. E digo aparente porque, no fondo, as súas inquedanzas, a súa visión do mundo segue igual de presente que antano.
Ata o vindeiro 17 de xullo pódese visitar no Pazo da Cultura de Pontevedra unha exposición única sobre a obra de Bagge. A fin de contas, Kiko da Silva, como comisario da mesma, deulle forma a Todo o mundo é imbécil menos eu especificamente para ser exposta na cidade do Lérez. «É unha exposición diferente porque o que quería é facer unha mostra para ler. De feito, a súa propia disposición está pensada para ser lida e por iso os cadros están presentados de dous en dous, siluetadas cunha revista de banda deseñada e as historietas están completas», engadiu, ao tempo que precisou que as mesmas están en castelán porque así foron cedidas por La Cúpula.
O obxectivo é eminentemente divulgativo, que o visitante comprenda que a banda deseñada «está feita para ler, non só para ver».
Neste punto, Kiko da Silva confesa que «están expostas as historietas que se podían expoñer ao público (...). Este home é moi destroyer e había algunhas que me encantaría poñer, pero vamos... nin de coña. Fixen unha selección das que me parecían máis divertidas e das más interesantes, pero das que se poderían poñer hoxe en día».
O certo é que o politicamente correcto pasa factura co correr dos anos a cuestións que, décadas atrás, eran obxecto de humor. «Cando estaba a facer a selección había algunhas historietas que sería imposible de poñer nunha sala de exposición pública. Era moi arriscado», apunta.
En todo caso, Da Silva deixa claro que o visitante seguirá atopando «irreverencia, un percorrido pola evolución de Odio, porque o personaxe principal, Buddy Bradley, foi evolucionando con Peter Bagge. Envelleceu, acabou tendo fillos...». De feito, o propio creador, durante a súa estancia en Pontevedra, sinalou que Buddy «foi envellecendo comigo. Tiña vinte anos máis ca mín. Casou, tivo fillos e foise convertendo nun tío cada vez máis excéntrico... Pero segundo ía crecendo, as vendas ían baixando. Tiña moitas ideas para seguir con Buddy Bradley, mais, ao final, as vendas mandan».
A exhibición non obvia unha das arestas, cecais unha das máis interesantes do autor estadounidense, a súa visión política. De feito, o nome da exposición fai referencia a un libro que «me parece fundamental para entender o que está pasando nos Estados Unidos. Fala do estropicio político que sucedeu nos últimos anos, do 11S, da globalización, da dependencia dos outros países, a carreira armamentística, a hipocrisía das persoas nas redes sociais... É unha mestura de libro humorístico e xornalístico, que é unha combinación moi difícil».