«Contribúe a afrontar o preámbulo do entroido favorecendo a actividade económica, xerando interese por visitar o noso municipio e permite que os establecementos teñan unha oportunidade de negocio e de movemento económico, que tamén é importante». Con estas palabras, o alcalde do Concello de Cerdedo-Cotobade, Jorge Cubela, presentou no Restaurante O Castiñeiro, de Pedre, a nova edición da Festa do Petote que se desenvolverá este domingo. Como ven sendo habitual, ademais da degustación gastronómica na Praza da Chan, que estará amenizada pola Charanga Louband, haberá postos de artesanía e alimentación.
Ademais, as 11.30 horas terá lugar o Petote Miudo con inchables e obradoiros de elaboración do petote. Os asistentes poderán probar de balde este elemento gastronómico, pero tamén outras pezas tradicionais presentes no cocido como son a cacheira ou o chourizo. No caso en que as condicións meteorolóxicas non sexan as axeitadas, a degustación realizarase baixo carpa.
Nesta edición, ademais, participarán como establecementos colaboradores na xornada de exaltación gastronómica do petote oito establecementos hostaleiros que ofrecerán un cocido completo a base de costela, lacón, chourizo de carne e ceboleiro, patacas, verdura, cacheira, petote e postre a un prezo común de 25 euros por persoa. Así, polo pronto, xa más de medio milleiro de persoas fixeron a súa reserva en A de Tucho, Casa Blanco, A Vosa Taberna, Mesón Casa Perdiz, A de Yoli, O Comareiro, Bar Obélix ou O Castiñeiro.
Cubela, salientou a importancia que os hostaleiros teñen na promoción e desenvolvemento da festa. «Son a alma mater desta festa. Sen a súa implicación activa a festa tería outro cariz ben distinto. Con esta festa queremos tamén dinamizar e axudar ao sector da hostalería local para que aproveite o pulo desta festa gastronómica para desenvolver a súa actividade dun xeito activo e proveitoso».