Rafa Fernández Cuarteto clausura o ciclo «Ao son do piano» no Museo de Pontevedra
PONTEVEDRA
Logo da actuación de Suelen Estar Quartet o pasado sábado, Rafa
Fernández Cuarteto será o encargado de pechar este mércores, a partires das 19 horas e con acceso libre ata completar a capacidade deste espazo, a segunda edición do ciclo de concertos Ao Son do Piano no Museo de Pontevedra. Esta iniciativa, impulsadas pola Deputación de Pontevedra, aposta por programar unha serie de actuacións acústicas de música clásica contemporánea arredor do piano de cola do Museo Provincial.
Dende esta entidade cultural salientaron o feito de que o guitarrista noiés Rafa Fernández lidera un cuarteto completado pola arpa de Bleuenn Lefriecc, o óboe e o corno inglés de Benxamín Otero e o piano e os sintetizadores de Álex Salgueiro. «Xuntos ofrecen unha exquisita mestura de sonoridades acústicas coma eléctricas, nun contexto de música ambiental e contemporánea, xéneros nos que este guitarrista leva máis de dez anos sendo unha das súas principais figuras no territorio galego», engadiron ao respecto.
Repertorio
Os asistentes poderán gozar cun concerto no que se repasaran temas de traballos discográficos como Aldán ou A cara bonita da pedra, así «como músicas escritas para diferentes proxectos audiovisuais cos que este músico percorreu gran número de escenarios na súa longa traxectoria», destacaron.