Unha nova edición da feira Pont-Up Store fixará o foco nas iniciativas que nacen no rural
PONTEVEDRA
Terá lugar os días 19 e 20 de setembro en Pontevedra
04 jun 2025 . Actualizado a las 05:00 h.O principal evento de fomento da innovación e o emprendemento do noroeste peninsular, Pont Up-Store, ten xa folla de ruta para unha nova edición, que será a número doce, na que mostrará en Pontevedra máis de 40 novas ideas de negocio a fin de semana do venres 19 e sábado 20 de setembro. No acto de presentación participaron as institución que apoian o Pont-Up Store: a concelleira de Promoción Económica do Concello de Pontevedra, Anabel Gulías; o secretario xeral de Emprego e Relacións Laborais da Xunta de Galicia, Pablo Fernández; o vicepresidente primeiro da Deputación de Pontevedra, Rafa Domínguez; a vicerreitora do Campus de Pontevedra da UVigo, Eva Lantarón. Xunto a eles, o director do Pont-Up Store, Pedro Figueroa Dorrego, quen explicou que «nesta edición queremos ser o escaparate da crecente cantidade de iniciativas de emprendemento que están xurdindo en toda Galicia, cunha campaña na que poñeremos un especial énfase nas vilas e aldeas do rural galego».
Sector audiovisual
Figueroa subliñou que neste 2025 se celebra o Ano Internacional das Cooperativas, polo que desde o Pont-Up Store vaise reforzar a aposta polas fórmulas de economía social á hora de emprender con varias actividades en colaboración coa Unión de Cooperativas Galegas Espazo Coop». Continuando coas novidades que se prevén para esta nova edición da feira da innovación e o emprendemento, Figueroa engadiu que «tamén queremos abrir espazos onde mostrar as iniciativas e o gran talento que hai noso sector audiovisual, entendido nun sentido amplo que inclúe tamén a música, os videoxogos e todas as derivadas das industrias culturais e creativas en sinerxía coas liñas profesionais do Campus Crea que deu orixe a este encontro».
No Pont-Up Store 2025 volverá haber tres modalidades de participación: presentar un emprendemento nun dos 35 stands gratuítos dispoñibles; propoñer actividades para dar a coñecer produtos e servizos; e participar na Pont-Up Venture, a audaz proposta en formato talent business que tan bos resultados obtivo na edición anterior e que este ano crecerá para acoller ata oito emprendementos que terán a oportunidade de presentar as súas ideas de negocio para acadar financiamento. Para conseguilo, terán que convencer en 3 minutos a un xurado composto porLuis Taboada, CEO da tecnolóxica Qbitia; Olimpia Carabel, directora de investimentos en Faraday Venture Partners; Jorge Leiro, xestor en Torsa Capital e no fondo Lugo Transforma; Carmen Pumariño, xestora do fondo de impacto de Zubi Capital e Jorge González, analista de novas oportunidades de investimento en Netaccede. Poden participar proxectos persoais e tamén de entidades, empresas, asociacións ou colectivos, que deben ter unha base tecnolóxica sólida ou destacar polo seu enfoque innovador. O proxecto empresarial mellor valorado recibirá unha contía económica, a inclusión no programa Perks de Google e o acceso preferente á incubadora ViaGalicia de Zona Franca.
Tres eixes
O director do Pont-Up Store tamén falou da campaña creativa desta edición, que parte dunha proposta da artista Sarai Lorenzo, unha das empresas integradas na Asociación para o Emprendemento e a Innovación Pont-Up Store.
Neste caso, a ilustradora realizou para o evento unha creación que ten como obxectivo «dar a coñecer dunha forma clara e atractiva as tres grandes áreas de participación do Pont-Up Store: stands, actividades e presentación de novos proxectos empresariais no formato Venture», explicou Pedro Figueroa.
Candidaturas abertas ata o 4 de xullo
Tanto para o Pont-Up Ventura como para participar con stand ou realizar unha actividade demostrativa, os emprendementos deben ter un percorrido de menos de 3 anos e medio (42 meses) dende a súa creación. As candidaturas para participar nesta edición poderanse presentar a unha ou varias modalidades ata o 4 de xullo a través da web www.pontupstore.com. A organizacio?n seleccionara? as iniciativas baseándose en criterios como a orixinalidade, innovacio?n e creatividade do proxecto; o valor social, a sustentabilidade, a claridade e concrecio?n, o potencial impacto econo?mico ou social, e a capacidade de desenvolvemento futuro.