Rufo xa ten destino e xogará na Unión Deportiva Ourense de Segunda Federación

Tras o anunciado adeus de Rufo das filas do Pontevedra CF, quen foi dianteiro granate durante as últimas seis campañas non tardou demasiado en atopar acomodo. O novo club do ariete madrileño será a UD Ourense.

Rufo xa se adestra co resto dos seus compañeiros e xogará na mesma categoría que a tempada pasada, nunha Segunda Federación na que tratará de consolidar o club de fútbol popular ourensán tras o seu ascenso hai uns meses. No equipo do Couto compartirá vestiario cun vello compañeiro como é o gardameta Manu Vizoso, quen foi un dos primeiros xogadores en atopar equipo da longa lista de baixas anunciada polo Pontevedra este verán.

A UD Ourense fixo oficial o pasado mércores pola noite a fichaxe do dianteiro, autor de máis de medio centenar de goles coa camiseta pontevedresa. Fíxoo a través dun vídeo nas súas redes sociais no que o propio Rufo atreveuse cunhas palabras en galego e animou á súa nova afección a seguir ao equipo no estadio do Couto. Ademais de Vizoso, no seu novo equipo reencontrarase con outros dous antigos compañeiros no equipo lerezano como Valentín Jaichenco, fichado este verán procedente do Estradense, e o veterano defensa central Pol Bueso.

Coa firma de Rufo en Ourense xa quedan menos futbolista do Pontevedra por resolver o seu futuro tras anunciar a súa baixa no club granate. Sen equipo coñecido mantéñense a día de hoxe os defensas Héctor Hernández, Mario Gómez, Igor e o aínda lesionado Pelayo. Tampouco atopou acomodo polo momento o centrocampista Jesús Cambil, quen se está exercitando estes días na selección AFE logo da súa recuperación da rotura do ligamento cruzado.

---

---

---