Co marchamo de recibir o premio ao Mellor Espectáculo de La Mostra de Igualada 2024 e ser un dos espectáculos finalistas dos Premios Max de Teatro 2025, a compañía Marie de Jongh, de Euskadi, chega este domingo ao Teatro Principal de Pontevedra con Mr. Bo. Enmarcada no ciclo de Domingos do Principal, programáronse dúas funcións, ás 12 e ás 18.30 horas, para as que aínda hai entradas a través de Ataquilla.com.
Trátase dunha peza de teatro de máscaras, muda, recomendada a partir de 5 anos na que se pon en escena a historia de tres criados que levan toda a vida servindo ao señor Bo. De feito, «xa non saben facer outra cousa. Están tan afeitos a cumprir as ordes do amo, que esqueceron o día no que tiveron a oportunidade de berrar ‘abonda’. Puideron facelo cando Bo era un neno», mais «agora é un adulto rosmón e parece demasiado tarde. Os tres criados xogan a imaxinar como sería o mundo se eles fosen os señores da casa».
Deste xeito, a obra pasa a converterse nunha metáfora dun fogar. Porque, a fin de contas, «que pai ou nai non pensa, nalgún momento, que criou un pequeno ditador? Como nos comportamos cando nos encontramos, cara a cara, coa tiranía?», preguntáronse dende a promotora desta peza.
Con Mr. Bo péchanse Domingos do Principal á espera de que se reprograme Molto Barroco, da compañía Píscore, que tivo que cancelarse por problemas de saúde dun intérprete.