A tradicional Procesión das Ánimas percorrerá o casco histórico de Pontevedra
PONTEVEDRA CIUDAD
O Concello capitalino centraliza a maior parte da programación do Samaín no Mercado de Abastos
27 oct 2024 . Actualizado a las 10:32 h.Coa denominación da Noite dos Calacús, o Concello de Pontevedra impulsa un completo programa de actividades centradas no Samaín que arrancou este mesmo sábado e se estenderá ata o 3 de novembro. «Temos por diante non unha noite de medo, senón unha semana de medo», remarcou Demetrio Gómez, concelleiro de Cultura, ao tempo que remarcou que «recuperamos a tradición dos nosos avós e o día 31 imos ter a Procesión das Ánimas».
Deste xeito, este mesmo domingo desenvolveranse dúas visitas guiadas ao cemiterio de San Amaro —ás 12 horas para un publico infantil e familiar e ás 18, adulto—, mentres que do 29 ao 31 de outubro varias panadarías de Pontevedra, caso de Amásame, Pumper, Acuña, Xeve, A Devesa e Solla, recuperarán a tradición do Pan de Ánimas con diferentes versións. «Antigamente en Galicia, na noite de Defuntos existía o costume de deixar anacos de pan na mesa para que comesen as ánimas. Esta tradición considérase que vén da crenza ancestral de que os defuntos levan consigo pan para axudarlles na viaxe ao alén. Sexa para axudar as ánimas ou para deleitar os vivos, queremos recuperar esta tradición senlleira da nosa cultura que está a piques de desaparecer», remarcaron dende o Concello.
O Mercado de Abastos será, pola súa banda, o epicentro dos actos do 31 de outubro habilitándose postos de comida e bebida, tren de castañas e obradoiros de tallado de calacús ou de cociña de defuntos, así como se gozará con contos de medo e arrepíos. Ademais, recuperarase a tradición dos colares de zonchos e desenvolveranse obradoiros de maquillaxe e disfraces de ánimas para poder acompañar a procesión que percorrerá o casco histórico a partires das 21 horas.
Neste eido, dende o concello precisaron que a Procesión das Ánimas, «coñecida actualmente co nome cristianizado da Santa Compaña», é «unha procesión silandeira que auguraba a morte e que agochaba o perigo de facer que quen se cruzase con ela acabase encabezando o desfile de defuntos. Recuperamos, para o lecer e para arredar o medo a morrer, esta tradición ancestral».
Unha hora antes, a Banda de Música de Pontevedra ofrecerá un concerto para, posteriormente, de 21.30 ata a medianoite desenvolverse a Festa da Noite dos Calacús amenizada por Señora DJ. E do 1 ao 3 de novembro, Mercado de Samaín no primeiro andar da praza de Abastos.