Os museos manteñen o pulso con máis de 30 propostas no último trimestre do ano
SANTIAGO
![](https://img.lavdg.com/sc/44jOIMnGiEfa6soV0UUVnqDAHjY=/480x/2020/10/22/00121603391942662193105/Foto/SO23C4F1_1.jpg)
O Museo das Peregrinacións conmemora o quinto aniversario en Praterías, a Cidade da Cultura pon música e cine ao outono e o CGAC aposta polos talleres
23 oct 2020 . Actualizado a las 23:18 h.Talleres, cursos, concertos, contacontos e visitas guiadas, todo iso sen esquecer a ampla oferta expositiva, son parte das máis de trinta propostas programadas polos museos composteláns dependentes da Xunta neste último trimestre. Aínda que adaptadas ás novas normas sanitarias, con restricións de capacidade e outras medidas de prevención, a actividade cultural mantén o seu latexo nos centros museísticos.
O Museo das Peregrinacións conmemorará o quinto aniversario da nova sede en Praterías o 6 e 7 de novembro. O inicio dos actos será cunha visita ás areas internas do edificio comentada por Ángel Panero -que ía ser presencial pero pasa a virtual debido ás restricións -. Ao día seguinte chegará a música cun concerto do grupo 1500 cun repertorio relacionado coas novas peregrinacións. Pero haberá moito máis para acompañar a actividade expositiva. Desde mañá ata finais de decembro regresará o ciclo Museo en Familia. Mañá, a partir das 19.00 horas, ofrecerá un concerto Mauricio Caruso Trío. O último sábado deste mes chegará un espectáculo poético-musical con Aldaolado. Xa en novembro será a quenda de Ghazafellos (día 14), Inacio Vilariño (día 21) e Pedro Brandariz (día 28). En decembro, para poñer o peche, actuarán Valentín Caamaño (día 12), Feminino Plural (día 19) e Isabel Risco e Fran Rei (día 26). Non faltarán os talleres infantís. A programación tamén incluirá a celebración do Día Internacional do Patrimonio Mundial (16 de novembro) e unha mesa redonda sobre Virxinia Pereira (17 de novembro). «Nestes momentos estamos adaptando todas as actividades á nova normativa que saíu no DOG, pero ímolas manter», explica a súa directora, Esperanza Gigirey. Con actividades como Museo en Familia e a conmemoración do aniversario da sede en Praterías, o obxectivo é «ofrecer propostas máis específicas para a xente de Santiago. Agora, ademais, coa situación que hai pola pandemia, estamos facendo todo o esforzo posible por manter estas actividades para que sendo un museo público como somos, que siga a actividade cultural, aínda que sexa con restricións. É contribuír a que non pare esa actividade e tampouco a xente que vive dela».
Ese obxectivo da Xunta de que a cultura siga tamén se reflicte na programación na Cidade da Cultura, onde ás mostras Galicia, de Nós a nós -que conmemora o centenario da revista Nós- e Cinema e emocións. Unha viaxe á infancia -coa que se percorren filmes que forman parte da infancia de diferentes xeracións-, únenselle outras propostas paralelas. As visitas didácticas con centros educativos á exposición sobre Nós comezan o martes 27 de outubro, mentres que as visitas relatorio con especialistas na revista e na xeración Nós, chegarán a partir do 3 de novembro, adaptadas aos aforos permitidos. Pola súa banda, a mostra sobre o cinema leva aparellado un ciclo de proxeccións. Haberá novas sesións este domingo e o 1 e 8 de novembro. Ademais, na Biblioteca de Galicia pode verse a exposición homenaxe a Concepción Arenal polo seu bicentenario.
Mañá a Cidade da Cultura inicia os Magostos no Gaiás, aínda que con aforo máis reducido do previsto inicialmente. Abrirá as citas Luar na Lubre, e seguiranlle Sumrrá (31 de outubro) e Milladoiro (14 de novembro).
O CGAC, pola súa banda, acompaña as exposicións de Antón Patiño, La Ribot e Francesc Torres, con percorrido guiados por elas todos os domingos a partir das 12.00 horas. O aforo, despois das novas restricións, queda limitado a catro persoas. Tamén o primeiro sábado de cada mes é posible un percorrido polo edificio e coñecer as súas claves arquitectónicas. En novembro sumarase á celebración do Día dos Museos -que fora aprazada pola pandemia- cun concerto de música contemporánea a cargo de Suelen Estar Quartet. Entre finais de novembro e principios de decembro desenvolverase un curso de introdución á ópera contemporánea, que está dirixido por Rosa María Fernández. Antes, os días 10, 11, 12, 16 e 17 de novembro, está previsto un taller con Francesc Torres. O que foi aprazado foi o obradoiro de arquitectura para público infantil previsto mañá.
Isaac Díaz Pardo, arquitectura debuxada e os camiños
Os museos da Xunta incorporarán tres novas exposicións durante novembro. O día 6 abrirá no Gaiás «As miradas de Isaac», unha homenaxe a Díaz Pardo con motivo do centenario do seu nacemento. Está comisariada por dous dos seus fillos, Xosé e Camilo Díaz Arias de Castro. Pola súa banda, no Museo dos Peregrinacións comezarán dúas mostras o próximo mes. Unha delas é «Dous camiños: Santiago versus Kumano», da man da artista Catalina Rodríguez e da fotógrafa Caroline White. É unha colaboración co encontro Compostela Ilustrada. A segunda mostra é «Arquitecturas debuxadas», que permitirá descubrir elementos arquitectónicos de Compostela da man dos debuxos do arquitecto e artista Santiago Catalán.