Sarabela Teatro presenta unha adaptación de «A lingua das bolboretas» e Teatro ó Cubo a peza «Ningures»
12 feb 2021 . Actualizado a las 19:55 h.O Teatro Principal acollerá de novo, se as circunstancias así o permiten, dúas obras en galego para a próxima fin de semana. A primeira delas vai ao cargo de Sarabela Teatro, que presenta unha adaptación de A lingua das bolboretas, un dos relatos de Manuel Rivas sobre os que se baseou o filme homónimo de José Luis Cuerda. A través da entrañable relación entre un neno e o seu profesor, no tempo do golpe á República, vaise coñecendo a beleza de realidades cotiás que pasan inadvertidas, como o mundo dos insectos.
A peza, dirixida por Gonçalo Guerreiro, ten unha duración de 70 minutos e haberá dúas funcións (o venres 19 e o sábado 20), ambas ás 20 horas. O prezo do billete é de 12 euros, sen contar cos descontos habituais que seguen funcionando.
A outra peza será Ningures, con Teatro ó Cubo, que lanza a súa cuarta produción marcada por unha nova estética e un diálogo co público infantil e familiar. Rita e Denís, que son interpretados por Sofía Espiñeira e Roberto Casal, cruzan os seus camiños no misterioso limiar das portas de Ningures, lugar ansiado por todos os viaxeiros. A obra afonda nos retos propios e frustracións, poñendo en valor a amizade, o fracaso como parte do camiño e o respecto pola diversidade de cada quen.
A función, de 60 minutos de duración será o domingo 21 ás 10 horas e terá un custo de catro euros. O público recomendado é a partir de seis anos.