A Asociación de Escritoras e Escritores en Lingua Galega celebrou onte asemblea no Museo do Pobo
02 mar 2025 . Actualizado a las 04:55 h.O político e autor de diversas publicacións Xosé Manuel Beiras será distinguido pola Asociación de Escritoras e Escritores en Lingua Galega (AELG) en xuño en Santiago. O colectivo de escritores aprobou na asemblea celebrada onte no Museo do Pobo que sexa o próximo «Escritor na súa Terra-Letra E» e quen reciba unha homenaxe. Deste xeito, queren recoñecer a súa extensa traxectoria vital, a súa faceta como ensaísta e tradutor, así como a súa xenerosa colaboración coa AELG, sendo parte do Consello Directivo da Asociación entre 1982 e 1986. Deste xeito, Beiras toma o testemuño doutro compostelán, Euloxio R. Ruibal, que foi distinguido durante o 2024. O acto inclúe, entre outras actividades, a entrega do galardón «Letra E» de escritor (unha peza escultórica), a plantación dunha árbore simbólica elixida polo propio autor, e a colocación dun monólito conmemorativo.
Ademais, a AELG tamén acordou distinguir como Escritora Galega Universal no 2025 á autora palestina Shahd Wadi. A homenaxeada naceu en Exipto, criouse en Xordania e asentouse en Portugal hai case dúas décadas, doutorándose en Estudos Feministas na Universidade de Coimbra.
Por outra banda, o colectivo presidido por Cesáreo Sánchez Iglesias tamén analizou o programa de actividades para este ano, que comezou cos actos polo Día de Rosalía, e que tamén incluirá paseos literarios, obradoiros, xornadas de formación e a gala dos Premios Mestres e Mestras da Memoria.