O Servizo de Axuda no Fogar oferta un programa pioneiro para manter máis activos aos usuarios
12 abr 2022 . Actualizado a las 05:05 h.A concellería de Servizos Sociais do Concello de Boqueixón, xunto coa empresa xestora do Servizo de Axuda no Fogar (Atendo), puxo en marcha no mes de xuño do ano pasado un programa pioneiro de estimulación cognitiva no domicilio. O obxectivo principal do mesmo é promover a vida activa das persoas que precisan de apoios domiciliarios, segundo explica a educadora social Rocío Vázquez. Ela forma parte do equipo técnico da empresa que está ao fronte do programa, xunto coa coordinadora do Servizo de Axuda no Fogar Sandra Nodar.
A idea desta iniciativa tamén é que o servizo de atención domiciliaria non sexa puramente asistencial senón que, dende unha perspectiva integral, as persoas usuarias teñan a posibilidade de desenvolver o seu proxecto vital sentíndose «protagonistas da súa propia vida e na comunidade», sinala a educadora social. Baixo este enfoque, o piar fundamental da acción é o propio colectivo, que conta co apoio imprescindible das familias, persoal auxiliar do servizo e o persoal técnico do departamento de Servizos Sociais do Concello e da empresa xestora.
Na actualidade, están a participar no programa 25 persoas que, dentro do seu horario de servizo de SAF, realizan actividades adaptadas ás súas necesidades. Entre elas, xa fixeron traballos artísticos e debuxos de entroido.
Unha desas usuarias é María Antonieta García Monteiro, de 89 anos e do lugar de Pumares, en Sergude. A súa filla valora moi positivamente o programa de estimulación e conta que á súa nai a axuda moitísimo a ter algo de consciencia. Mesmo lle valeu, engade a proxenitora, para pintar, algo que nunca fixera. «Neses momentos ela está feliz», afirma a filla, que agradece ao Concello poder dispor do servizo. «Axuda a que as persoas maiores non se atrofien e se manteñan máis activas», asegura.